Fidan zbarkon në Berlin: Turqia kërkon rol në sigurinë e Evropës
Ministri i Jashtëm i Turqisë, Hakan Fidan, do të zhvillojë një vizitë zyrtare në Gjermani, ku do të marrë pjesë në takimin e tretë të Mekanizmit të Dialogut Strategjik Turqi–Gjermani. Takimi në Berlin do të bashkëkryesohet nga Fidan dhe homologu i tij gjerman, Johann Wadephul, ndërsa në fokus do të jenë marrëdhëniet dypalëshe, raportet Turqi–BE, siguria, mbrojtja, ekonomia dhe çështjet rajonale.
Në takim, Fidan pritet të theksojë rëndësinë e forcimit të bashkëpunimit mes dy vendeve, veçanërisht në tregti, investime, teknologji të lartë, digjitalizim, energji të gjelbër dhe industrinë e mbrojtjes. Gjermania mbetet një nga partnerët më të rëndësishëm të Turqisë, me një volum tregtar prej 52.2 miliardë dollarësh, ndërsa synimi i dy vendeve është rritja e këtij niveli në 60 miliardë dollarë.
Një pjesë kyçe e diskutimeve do të jetë edhe marrëdhënia Turqi–BE. Fidan pritet të kërkojë avancimin e negociatave për modernizimin e Bashkimit Doganor dhe riaktivizimin e dialogut për liberalizimin e vizave, duke theksuar se një strategji evropiane sigurie që përjashton Turqinë do të mbetet e paplotë.
Në agjendën rajonale, Fidan do të ngrejë çështjen e lirisë së lundrimit në Ngushticën e Hormuzit, luftën Iran–SHBA, konfliktin Rusi–Ukrainë dhe situatën në Gaza. Ai pritet të akuzojë Izraelin për politika ekspansioniste dhe shkelje të armëpushimit, duke kërkuar që komuniteti ndërkombëtar të marrë më shumë përgjegjësi për paqen dhe stabilitetin në rajon.