Evropa ngrihet për Nakbën: dhjetëra mijëra në rrugë kundër luftës në Gaza
Dhjetëra mijëra qytetarë kanë protestuar në disa qytete të Evropës për të përkujtuar 78-vjetorin e Nakbës, “Katastrofës” palestineze që lidhet me dëbimin dhe zhvendosjen masive të palestinezëve gjatë krijimit të Izraelit në vitin 1948.
Në Stokholm, turma të mëdha u mblodhën në sheshin Odenplan, pas thirrjes së disa organizatave të shoqërisë civile, duke kërkuar ndalimin e menjëhershëm të atyre që i cilësuan si krime lufte izraelite në Gaza.
Në Athinë, protestuesit marshuan nga Parku Eleftheria drejt ambasadave të Izraelit dhe Shteteve të Bashkuara. Demonstrata u organizua nga grupe pro-palestineze dhe organizata të majta.
Protesta u zhvilluan edhe në Paris, ku qytetarët dolën në rrugë në mbështetje të palestinezëve. Aktivisti Salah Hamouri deklaroi se situata aktuale në Gaza dhe në rajonin më të gjerë përfaqëson vazhdimin e Nakbës, ndërsa disa protestues kritikuan pjesëmarrjen e Izraelit në ngjarje kulturore ndërkombëtare.
Në Londër, policia ndërmori një operacion të madh sigurie për shkak të disa marshimeve të zhvilluara në të njëjtën kohë, përfshirë edhe tubimin pro-palestinez të lidhur me përvjetorin e Nakbës. Policia Metropolitane njoftoi se mijëra efektivë, të mbështetur nga njësi të specializuara, u vendosën në terren për të shmangur përplasjet me grupe rivale.
Sipas autoriteteve britanike, operacioni përfshiu automjete të blinduara, njësi me kuaj, dronë dhe helikopterë, ndërsa grupe të ndryshme u mblodhën në qendër të Londrës.
Çdo vit më 15 maj, palestinezët në mbarë botën përkujtojnë Nakbën, fjalë arabe që do të thotë “katastrofë”, në kujtim të dëbimit dhe zhvendosjes masive që shoqëroi krijimin e Izraelit në vitin 1948.