Warren Buffett ndërpret donacionet për Fondacionin Gates pas zbulimeve për lidhjet e Bill Gates me Jeffrey Epstein
Investitori miliarder Warren Buffett ka përjashtuar Fondacionin Gates nga lista e organizatave që do të përfitojnë nga donacionet e tij të ardhshme, duke i dhënë fund një bashkëpunimi financiar që zgjati rreth dy dekada. Vendimi vjen disa muaj pas publikimit të dokumenteve dhe dëshmive të reja mbi marrëdhënien e Bill Gates me Jeffrey Epstein, të dënuarin për krime seksuale. Buffett nuk e përmendi drejtpërdrejt Gates apo Epstein në deklaratën e tij të fundit, por më herët kishte thënë se nuk kishte komunikuar me bashkëthemeluesin e Microsoft që prej daljes së çështjes në publik.
Në vitin 2006, Buffett ishte zotuar të dhuronte çdo vit aksione të Berkshire Hathaway për Fondacionin Bill dhe Melinda Gates. Gjatë 20 viteve, kontributet e tij për fondacionin arritën në rreth 47 miliardë dollarë.
Sipas planit të ri, aksionet e mbetura të Buffett do të shpërndahen deri në fund të vitit 2034 mes katër fondacioneve të lidhura me familjen e tij.
Ndërkohë, Bill Gates është marrë në pyetje nga Komiteti Mbikëqyrës i Dhomës së Përfaqësuesve të SHBA-së për kontaktet e tij me Epstein. Gates ka deklaruar se ishte takuar me të duke besuar se mund të ndihmonte në sigurimin e miliarda dollarëve për projektet globale të shëndetësisë, por ka pranuar se takimet me Epstein ishin një gabim.
Fondacioni Gates, nga ana e tij, falënderoi Buffett për dekadat e mbështetjes dhe deklaroi se vazhdon të ketë një pozicion të fortë financiar për të vijuar aktivitetin deri në vitin 2045.