Firma turke e mbrojtjes përgatit mjet autonom nënujor dhe prototipin barkës së shpejtë raketahedhëse
STM-ja ka përfunduar testimet për nëndetësen autonome vendase Neta, së bashku me ndërtimin paralel të shtatë fregatave shtesë për Marinën Turke
Kompania turke e mbrojtjes STM prezantoi projektet e saj më të fundit detare në kuadër të festivalit "TEKNOFEST Atdheu Blu", përfshirë barkën e shumëpritur të shpejtë raketahedhëse të zhvilluar në vend.
Drejtori i Përgjithshëm i STM-së, Ozgur Guleryuz, tha për Anadolu se kompania planifikon të lëshojë prototipin e parë të projektit deri në fund të këtij viti ose në fillim të vitit të ardhshëm, pas së cilës do të nisë puna për pajisjen e tij.
"Prodhimi i shtatë fregatave të tjera të klasës Istif për Marinën Turke po vazhdon me një ritëm shumë intensiv dhe planifikojmë të përfundojmë ndërtimin dhe testimet sa më shpejt të jetë e mundur", tha ai në margjinat e TEKNOFEST Atdheu Blu, partner global i komunikimit i të cilit është Anadolu.
Guleryuz tha se STM-ja po zgjeron praninë e saj në sektorin e sistemeve nënujore pa ekuipazh, duke kombinuar ekspertizën e saj në fushën ushtarake detare me përvojën në mjetet ajrore taktike pa ekuipazh të fituar përmes programit të dronit Kargu.
Mjeti autonom nënujor i zhvilluar në vend nga kompania, Neta, ka hyrë në prodhim masiv dhe së shpejti do të pasohet nga sisteme të reja nënujore të projektuara për misione, përfshirë kërkimin dhe neutralizimin e minave, si dhe kërkim-shpëtimin.
"Edhe aktivitetet tona të eksportit po vazhdojnë me ritëm të shpejtë. Gjatë katër muajve të fundit, ne lansuam njëra pas tjetrës tri korveta të Malajzisë, në atë që mund të jetë kohë rekord", tha ai, duke iu referuar projektit "Littoral Mission Ship Batch 2" për Marinën Mbretërore të Malajzisë.
Kompania ka përfunduar gjithashtu anijen e parë në kuadër të një projekti detar ukrainas, ndërsa dorëzimi i së dytës është planifikuar për vitin 2027.
STM-ja po zgjeron gjithashtu praninë e saj në tregjet evropiane dhe po përgatitet të zhvillojë ceremoninë e fillimit të ndërtimit për anijen e dytë të furnizimit dhe mbështetjes logjistike për Marinën Portugeze.
"Ne po punojmë në shumë vende për platforma të ndryshme, duke përshtatur platformat ekzistuese me kërkesat operacionale dhe duke zhvilluar zgjidhje të përshtatura për secilin klient, duke shfrytëzuar kapacitetet inxhinierike të STM-së. Shpresojmë të ndajmë lajme të tjera të mira lidhur me eksportet në të ardhmen e afërt", shtoi ai.