Riali iranian arrin në nivelin më të ulët historik ndaj dollarit amerikan
Presioni ndaj monedhës u shtua pasi Washington kërkoi të izolonte Teheranin duke kërcënuar partnerët e tij të mbetur tregtarë, duke bllokuar portet kryesore në Gjirin Persik dhe duke penguar të ardhurat jetike nga nafta e papërpunuar.
Monedha iraniane arriti nivelin më të ulët historik ndaj dollarit amerikan, ndërsa bllokada ekonomike amerikane që po ashpërsohet goditi ekonominë e vendit pas gati gjashtë muajsh konflikti, transmeton Anadolu.
Riali tregtohej me rreth 2 milionë për një dollar në tregun e parregulluar të hënën, sipas faqes së monitorimit TGJU, duke rënë me 4,5 për qind që kur presidenti amerikan Donald Trump njoftoi javën e kaluar një fushatë të gjerë kundër Teheranit.
Presioni ndaj monedhës u shtua pasi Washington kërkoi të izolonte Teheranin duke kërcënuar partnerët e tij të mbetur tregtarë, duke bllokuar portet kryesore në Gjirin Persik dhe duke penguar të ardhurat jetike nga nafta e papërpunuar.
Sekretari amerikan i Thesarit, Scott Bessent, pritet të njoftojë masa të reja ekonomike ndaj Iranit të hënën, ndërsa Washingtoni po intensifikon përpjekjet për ta izoluar më tej Teheranin financiarisht dhe tregtarisht.
Bessent e përshkroi fushatën e planifikuar si një “Ditë D ekonomike”, duke thënë se Washingtoni synon të ndërpresë burimet e mbetura të jetesës ekonomike të Iranit.
Presidenti amerikan, Donald Trump, gjithashtu ka kërcënuar me atë që e quajti “operacionin më shkatërrues ekonomik të ndërmarrë ndonjëherë kundër një vendi”, duke paralajmëruar ndëshkime të ashpra për vendet që ndihmojnë Teheranin t’u shmanget sanksioneve amerikane.