Krizë në Izrael? Mungesa e fondeve godet gatishmërinë ushtarake
Ushtria izraelite përballet me mungesë fondesh që po dëmton gatishmërinë e saj ushtarake, tha të enjten shefi i Shtabit të Përgjithshëm, Eyal Zamir, transmeton Anadolu.
“Fatkeqësisht, këto ditë po përballemi gjithashtu me një sfidë sa i përket buxhetit të IDF-së. Në një kohë kur IDF-ja dhe personeli i saj po veprojnë në të gjitha frontet, duhet të përballemi me mungesë fondesh. Një situatë e tillë dëmton gatishmërinë e IDF-së”, tha Zamir gjatë një vlerësimi të situatës në disa fronte, sipas një deklarate të ushtrisë.
Deklaratat vijnë në një kohë kur Ministria e Mbrojtjes dhe Ministria e Financave të Izraelit janë në mosmarrëveshje lidhur me financimin shtesë për ushtrinë.
Mediat izraelite raportuan këtë muaj se ushtria përballet me një mungesë buxhetore prej rreth 40 miliardë shekelësh (12,3 miliardë dollarë), kryesisht për shkak të shpenzimeve të vazhdueshme operacionale dhe kostove të shërbimit rezervist.
Mosmarrëveshja për financimin ka ndikuar gjithashtu në programet e prokurimit ushtarak, përfshirë blerjet e planifikuara të avionëve luftarakë dhe municioneve.
Buxheti i mbrojtjes i Izraelit për vitin 2026 fillimisht ishte përcaktuar në rreth 143 miliardë shekelë, përfshirë fondet për operacionet ushtarake, sipas Knessetit.