Grupet e të drejtave të njeriut i kërkojnë BE-së të pezullojë marrëveshjen tregtare me Izraelin
Mbi 200 organizata të shoqërisë civile i kanë bërë thirrje Bashkimit Evropian (BE) që të pezullojë pa vonesë marrëveshjen tregtare BE-Izrael për shkak të luftës vdekjeprurëse izraelite në Gaza dhe shkeljes së të drejtave themelore të njeriut, transmeton Anadolu. Komiteti për Heqjen e Borxhit të Paligjshëm (CADTM) publikoi një letër të hapur në faqen e tij sot, e cila iu drejtua shumë zyrtarëve të BE-së, duke përfshirë Presidenten e Komisionit Ursula von der Leyen, Presidentin e Këshillit të BE-së Charles Michel dhe shefin e politikës së jashtme Josep Borrell.
Më shumë se 200 OJQ në gjithë Evropën, përfshirë Oxfam, i kanë bërë thirrje BE-së të pezullojë Marrëveshjen e Asociimit BE-Izrael, duke vënë në dukje se shkeljet e të drejtave të njeriut në Gaza “përbëjnë shkelje të klauzolave të ‘elementeve thelbësore’ të cilat thonë se marrëveshja kushtëzohet nga respektimi i palëve për të drejtat e njeriut dhe parimet demokratike”.
Grupet thanë gjithashtu se “shkelja e të ashtuquajturave klauzola ‘elemente thelbësore’ i mundëson BE-së të përfundojë ose të pezullojë plotësisht ose pjesërisht marrëveshjet”.
Pavarësisht të gjitha atyre shkeljeve, ekonomia e Izraelit “vazhdon të gëzojë akses të privilegjuar në tregun e BE-së” nëpërmjet kësaj marrëveshjeje dhe blloku është partneri kryesor tregtar i Izraelit, duke përbërë 28,8 për qind të tregtisë së tij në mallra në vitin 2022”, thuhet në letër.
Grupet kritikuan gjithashtu komunitetin ndërkombëtar për “dështim politik dhe moral” që rezultoi në zhvillimet aktuale në Gaza dhe i bënë thirrje BE-së të dërgojë një “mesazh të fortë” duke pezulluar marrëveshjen me Izraelin.
Izraeli ka zhvilluar një ofensivë ushtarake vdekjeprurëse në Gaza që nga një inkursion ndërkufitar nga grupi palestinez Hamas më 7 tetor 2023, në të cilin Tel Avivi thotë se janë vrarë 1.200 njerëz.
Më shumë se 31.800 palestinezë, kryesisht gra dhe fëmijë, janë vrarë që atëherë në enklavë nga sulmet izraelite dhe rreth 74.000 të tjerë janë plagosur, përveç shkatërrimit në masë dhe mungesës së nevojave.
Lufta izraelite ka shtyrë 85 për qind të popullsisë së Gazës në zhvendosje të brendshme, krahas një bllokade gjymtuese të shumicës së ushqimeve, ujit të pastër dhe ilaçeve, ndërsa 60 për qind e infrastrukturës së enklavës është dëmtuar ose shkatërruar, sipas OKB-së.
Izraeli akuzohet për gjenocid në GJND. Një vendim i përkohshëm në janar urdhëroi Tel Avivin të ndalojë aktet gjenocidale dhe të marrë masa për të garantuar ofrimin e ndihmës humanitare për civilët në Gaza./Nga AA