Paqja Ukrainë-Rusi më afër? Zelenskyy zbulon planin e ri të Trump pas takimit me Witkoff&Kushner
Presidenti ukrainas, Volodymyr Zelenskyy, tha të martën se i dërguari i posaçëm i SHBA-së, Steve Witkoff, dhe dhëndri i presidentit, Donald Trump, Jared Kushner, paraqitën disa ide “të mira” për mënyrën se si t’i jepet fund luftës Rusi-Ukrainë gjatë bisedimeve të zhvilluara gjatë fundjavës.
“Do t’ju them sinqerisht, vërtet, disa ide ishin shumë të mira, të vlefshme”, tha Zelenskyy gjatë një informimi me gazetarë të publikuar të martën nga disa media ukrainase, përfshirë agjencinë shtetërore të lajmeve Ukrinform dhe portalin e lajmeve Novyny Live, duke u shprehur se ende nuk e di nëse këto ide do të zbatohen.
Deklaratat e Zelenskyyt erdhën pasi presidenti ukrainas zhvilloi të dielën bisedime me Witkoff dhe Kushner në Kiev. Vizita shënoi herën e parë që dy të dërguarit vizituan Ukrainën dhe erdhi pasi një ditë më parë ata zhvilluan negociata me presidentin rus, Vladimir Putin në Moskë.
Gjatë informimit, Zelenskyy argumentoi se vizita e Witkoff dhe Kushner në kryeqytetin ukrainas tregoi se vendi i tij jo vetëm që është forcuar në fushëbetejë, por se edhe pozita e tij negociuese është përmirësuar.
Duke iu referuar sulmeve të natës ndaj Ukrainës, Zelenskyy tha se Kievi ka nevojë për “paketa raketash balistike” nga SHBA-ja dhe se Washingtoni i ka dëgjuar në detaje nevojat e vendit të tij në këtë kontekst.
“Po llogaris në një takim në datat 20 e ca (të shtatorit) me Presidentin (Donald) Trump, për ta ngritur këtë çështje dhe, me dëshirën e Zotit, do të ketë rezultat”, tha më tej Zelenskyy.
Zelenskyy nuk dha detaje të tjera, por tha se palët aktualisht po ecin drejt një formati takimi trilateral, duke bërë të ditur se së shpejti do të zhvillohet një takim me Evropën dhe SHBA-në në nivel këshilltarësh.
Ai theksoi se pala ukrainase do të punojë për përgatitjen e negociatave në format trilateral pasi të takohet me Trump.
Zelenskyy përmendi Turqinë, Emiratet e Bashkuara Arabe dhe Zvicrën si vende të mundshme për zhvillimin e negociatave të reja trilaterale, ku sipas tij do të diskutohen çështjet e energjisë dhe grurit. Ai gjithashtu theksoi nevojën për rritjen e shkëmbimeve të të burgosurve dhe “përshpejtimin e tyre”.
Kievi është i gatshëm të kërkojë kompromise me Moskën për çështjet e eksporteve të grurit dhe energjisë, tha Zelenskyy, duke shtuar se në këtë kontekst hapa duhet të ndërmerren nga të dyja vendet dhe jo vetëm nga Ukraina.