Gjermania: Aleatët evropianë të NATO-s do të rrisin shpenzimet e tyre të mbrojtjes
Ministri gjerman i Mbrojtjes, Boris Pistorius, ka bërë të ditur se aleatët evropianë të NATO-s do të rrisin shpenzimet e tyre ushtarake për një ndarje të drejtë të barrës në të dy anët e Atlantikut, transmeton Anadolu.
Duke folur me gazetarët gjatë një takimi ministror në selinë e NATO-s, Pistorius tha se ata do të fokusohen në përgatitjet për samitin e aleancës muajin e ardhshëm në Washington.
"Qëllimi ynë i përbashkët mbetet të sigurojmë që NATO-ja të jetë në gjendje të mbrojë çdo centimetër katror të territorit të saj, sa herë që kjo të jetë e nevojshme. Duhet të kemi një frenim të fortë dhe për këtë të gjithë anëtarët e aleancës japin kontributin e tyre", tha Pistorius.
Ministri gjerman ripohoi se vendi i tij, ekonomia më e madhe e Evropës, do të rrisë ndjeshëm shpenzimet e saj ushtarake këtë vit, për të përmbushur objektivin e NATO-s për të shpenzuar 2 për qind të prodhimit të brendshëm bruto të vendit për mbrojtjen.
"Për Gjermaninë mund të them se ne po bëjmë detyrat e shtëpisë, të gjithë e dini se po arrijmë objektivin prej 2 për qind këtë vit për herë të parë në më shumë se dy dekada. Shumica e aleatëve të tjerë evropianë të NATO-s, rreth 20 prej tyre, synojnë dhe gjithashtu do të arrijnë objektivin prej 2 për qind", tha ai.
Ai theksoi se ky është një mesazh i rëndësishëm për të gjithë partnerët e NATO-s, por "sigurisht veçanërisht për aleatin tonë amerikan".
"Evropa po jep, Evropa po bën pjesën e saj si pjesë e përgjegjësisë sonë të përbashkët", shtoi ai,
Komentet e tij erdhën derisa kryeqytetet evropiane ndjekin me ankth zgjedhjet presidenciale në SHBA dhe frikësohen se një mandat i dytë për ish-presidentin Donald Trump mund të ndikojë negativisht në aleancën e NATO-s.
Trump ka kritikuar në mënyrë të përsëritur aleatët evropianë të SHBA-së se nuk kanë ndarë barrën financiare të NATO-s, duke e zhvendosur barrën mbi taksapaguesit amerikanë. Ai ka kërcënuar se do të tërhiqen trupat amerikane nga Evropa./AA