Erdogani thirrje OKB-së: Të ndërhyet me forcë nëse I*zraeli nuk ndalon sulmet në Gaza
Presidenti turk Recep Tayyip Erdogan, ka deklaruar dje (30 shtator) se Asambleja e Përgjithshme e Kombeve të Bashkuara duhet të rekomandojë përdorimin e forcës, në përputhje me një rezolutë të miratuar në vitin 1950, nëse Këshilli i Sigurimit i OKB-së nuk arrin të ndalojë sulmet e Izraelit në Gaza. dhe Libanit. “Komuniteti ndërkombëtar nuk mund të qëndrojë më i heshtur ndaj banditizmit të Izraelit që i ka vënë flakën të gjithë rajonit.
Nëse Këshilli i Sigurimit nuk tregon vullnetin e nevojshëm, Asambleja e Përgjithshme duhet të vërë me shpejtësi në zbatim autoritetin e saj për të përdorur forcën, si në rezolutën e Bashkimit për Paqe të vitit 1950”, tha Erdogan.
Sipas Reuters rezoluta në fjalë thotë se Asambleja e Përgjithshme e Organizatës së Kombeve të Bashkuara mund të ndërhyjë nëse 5 shtetet me të drejtë vetoje në Këshillin e Sigurimit - SHBA, Britania, Kina, Franca dhe Rusia - nuk arrijnë të sigurojnë paqen në botë.
Këshilli i Sigurimit është i vetmi organ i OKB-së që mund të marrë vendime që kanë fuqin e ligjeve, si autorizimi i përdorimit të forcës dhe vendosja e sanksioneve.
Turqia, vend anëtar i NATO-s, ka denoncuar disa herë sulmet e Izraelit në Gaza dhe ka ndërprerë të gjitha marrëdhëniet tregtare me të.
Gjithashtu, Ankaraja ka kërkuar të jetë pjesë e çështjes së gjenocidit të ngritur kundër Izraelit në Gjykatën Ndërkombëtare Penale, akuza të cilat Izraeli i hedh poshtë./ReportTv.al