"Netanyahu po shqyrton shkarkimin e shefit të ushtrisë dhe atij të Shin Betit pas shkarkimit të Gallantit"
Kryeministri izraelit Benjamin Netanyahu thuhet se po shqyrton shkarkimin e shefit të ushtrisë dhe atij të shërbimit të inteligjencës së brendshme Shin Bet pas vendimit të tij të sotëm për të shkarkuar ministrin e Mbrojtjes Yoav Gallant, transmeton Anadolu.
Sipas të përditshmes izraelite Haaretz, një burim i afërt me Netanyahu ka thënë se kryeministri po shqyrton shkarkimin e shefit të ushtrisë dhe atij të Shin Betit. Gazeta Yedioth Ahronoth raportoi se “Netanyahu thuhet se po shqyrton zëvendësimin e shefit të shtabit të IDF-së Herzi Halevi dhe drejtorit të Shin Betit Ronen Bar në të ardhmen e afërt”.
“Megjithatë, një zyrtar i lartë i afërt me Netanyahun tha: ‘Ne nuk jemi ende në atë pikë’, por nuk përjashtoi lëvizje të tilla në një moment të ardhshëm”, shtoi gazeta.
Diskutimet rreth shkarkimit të liderit ushtarak dhe atij të inteligjencës vijnë menjëherë pas njoftimit të sontëm se Netanyahu ka shkarkuar Gallantin dhe e ka zëvendësuar atë me ministrin e Jashtëm Israel Katz.
Ky vendim ka ngjallur reagime politike në gjithë vendin, me thirrje për protesta.
Sipas një deklarate nga zyra e Netanyahut, Gideon Sa'ar, lideri i Partisë së Djathtë Kombëtare, është emëruar ministër i Jashtëm në vend të Israel Katzit.
Në përgjigjen e tij të parë, Gallant u shpreh në X: “Siguria e shtetit të Izraelit ka qenë dhe do të jetë gjithmonë misioni im jetësor”.
Yedioth Ahronoth raportoi se Netanyahu e ka informuar Gallantin për shkarkimin e tij vetëm dhjetë minuta para njoftimit zyrtar.
Lideri i opozitës Benny Gantz, kreu i Partisë së Qëndrueshmërisë së Izraelit, komentoi gjithashtu në X, duke deklaruar: “Politika në kurriz të sigurisë kombëtare”.
Ndërkohë, Yair Golan, kreu i Partisë Demokratike të Izraelit, lëshoi një thirrje në X, duke u bërë thirrje qytetarëve të protestojnë në rrugë pas shkarkimit të Gallantit.
Nga ana e tij, lideri i opozitës Yair Lapid shkroi në X: “Të pushosh Gallantin në mes të luftës është një akt çmendurie, u bëj thirrje izraelitëve të dalin në rrugë sonte në protestë”.
Ndërkaq, ministri izraelit i Sigurisë Kombëtare Itamar Ben-Gvir komentoi gjithashtu vendimin e Netanyahut për të shkarkuar Gallantin, duke deklaruar në X se kryeministri bëri mirë që e largoi atë nga posti i tij./AA