Liga arabe refuzon çdo përpjekje të I"zraelit për të dëmtuar Irakun, paralajmëron për l.uftë rajonale
Liga Arabe ka hedhur poshtë njëzëri çdo përpjekje izraelite për të dëmtuar Irakun, duke paralajmëruar për një "luftë rajonale", transmeton Anadolu. Një rezolutë e miratuar nga një takim urgjent të organit pan-arab të mbajtur dje dënoi përpjekjen e Izraelit "për të zgjeruar praktikat e tij agresive në rajon, duke përfshirë Irakun". Rezoluta paralajmëroi për "rrezikun e një përshkallëzimi të përgjithshëm izraelit që rrezikon të ndezë një luftë të gjerë rajonale që kërcënon sigurinë dhe stabilitetin në rajon". "Rezoluta u miratua unanimisht me mbështetjen e të gjitha delegacioneve arabe për të treguar mbështetje për Irakun", tha në një deklaratë të hënën ambasadori i Katarit në Egjipt, Tariq Al-Ansari.
Takimi i së dielës u mbajt në nivel të delegatëve të përhershëm, me kërkesë të Irakut.
Javën e kaluar, ministri i Jashtëm izraelit Gideon Sa'ar tha se ai i kishte dërguar një letër presidentit të Këshillit të Sigurimit të OKB-së, e cila kërkonte "veprim të menjëhershëm" në lidhje me milicitë pro-iraniane që përdorin territorin irakian për të sulmuar Izraelin.
Ai i bëri thirrje Këshillit të Sigurimit "të veprojë urgjentisht për t'u siguruar që qeveria irakiane përmbush detyrimet e saj sipas ligjit ndërkombëtar dhe të ndalojë këto sulme ndaj Izraelit".
Kryeministri irakian Mohammed Shia al-Sudani, nga ana e tij, paralajmëroi se letra izraelite mund të shërbejë si një pretekst për të sulmuar vendin e tij.
Tensioni rajonal është përshkallëzuar për shkak të ofensivës brutale të Izraelit në Rripin e Gazës, ku ka vrarë mbi 44.200 njerëz, kryesisht gra dhe fëmijë, që nga një sulm i Hamasit vitin e kaluar.
Konflikti është përhapur në Liban, ku Izraeli ka nisur sulme vdekjeprurëse në të gjithë vendin, në një përshkallëzim serioz pas përleshjeve ndërkufitare midis Izraelit dhe Hezbollahut që nga fillimi i luftës në Gaza.
Të enjten, Gjykata Penale Ndërkombëtare lëshoi urdhërarreste për kryeministrin izraelit, Benjamin Netanyahu dhe ish-ministrin e tij të Mbrojtjes, Yoav Gallant, duke i akuzuar për krime lufte dhe krime kundër njerëzimit në Gaza.
Izraeli gjithashtu përballet me një çështje gjenocidi në Gjykatën Ndërkombëtare të Drejtësisë për luftën brutale ndaj Gazës./AA