Përplasja e aeroplanit me helikopterin në Washington, zyrtarët nuk besojnë se ka të mbijetuar
Disa orë pas aksidentit midis një helikopteri të ushtrisë dhe një aeroplani pasagjerësh pranë Washington-it, zyrtarët lokalë njoftuan se kanë braktisur operacionet e shpëtimit dhe fokusohen në operacionet e rikuperimit, duke mos pritur të ketë të mbijetuar, raporton Anadolu.
Avioni, me 60 pasagjerë dhe katër anëtarë të ekuipazhit, po kthehej nga Kansasi. Helikopteri, i cili ishte në një fluturim stërvitor, kishte në bord tre ushtarakë. Avioni i pasagjerëve u rrëzua në lumin Potomac.
"Pavarësisht të gjitha atyre përpjekjeve, ne jemi tani në një pikë ku po kalojmë nga një operacion shpëtimi në një operacion rikuperimi", tha të enjten John Donnelly, kreu i Shërbimeve Mjekësore të Zjarrfikësve dhe Emergjencave në Washington.
"Në këtë pikë nuk besojmë se ka ndonjë të mbijetuar nga ky aksident", shtoi ai.
Zyrtari tha se deri më tani, kufomat e 27 personave janë nxjerrë nga avioni, si dhe një kufomë nga helikopteri.
"Zyra e Mjekësisë së Qarkut është fokusuar për t'i dorëzuar këto kufoma të dashurve të tyre. Dhe ne do të vazhdojmë të punojmë për të gjetur të gjithë kufomat, për t'i ribashkuar me të dashurit e tyre", tha Donnelly.
Në aksidentin që ndodhi mbrëmë vonë sipas kohës lokale, një aeroplan pasagjerësh i American Airlines dhe një helikopter Black Hawk i Ushtrisë Amerikane u përplasën në ajër pranë aeroportit Ronald Reagan në Washington./AA