Lëvizjet e fundit të Trumpit shqetësojnë Evropën, Macron i thërret liderët evropianë në një samit urgjent në Paris
Evropa ka qenë nën presion orët e fundit, pasi lëvizjet diplomatike të SHBA-së në lidhje me Ukrainën po shqetësojnë vendet anëtare të Bashkimit. Për këtë arsye, presidenti francez Emmanuel Macron ka ftuar liderët evropianë në një samit të hënën në Paris. Kjo sipas ministrit të Jashtëm polak, Radosław Sikorski.
“Më vjen shumë mirë që presidenti Macron ka thirrur liderët tanë në Paris”, tha Sikorski, duke shtuar se ai pret që liderët evropianë të diskutojnë “në një mënyrë shumë serioze” sfidat e paraqitura nga presidenti i SHBA-së, Donald Trump.
“Presidenti Trump ka një metodë operimi të cilën rusët e quajnë “razvedka boyem” – zbulim përmes betejës: ju shtyni dhe shihni se çfarë ndodh, dhe më pas ndryshoni pozicionin tuaj… Dhe ne duhet të përgjigjemi,” tha ministri polak.
Nuk është ende e qartë nëse takimi do të përfshijë të gjithë liderët e BE-së, apo vetëm një grup më të vogël vendesh, dhe nëse do të ftoheshin edhe liderë të tjerë evropianë si kryeministri i Mbretërisë së Bashkuar, Keir Starmer.
Një zëdhënës francez nuk komentoi mbi këtë çështje. Ministri i Jashtëm francez Jean-Noel Barrot, i cili ishte në panel me Sikorskin në Mynih, nuk e konfirmoi apo mohoi samitin e urgjencës.
Sikorski tha më vonë se kryeministri polak Donald Tusk do të udhëtojë të hënën me ftesë të Macron në takim. “Ne duhet të tregojmë forcën dhe unitetin tonë”, tha Sikorski në një postim në mediat sociale./Reporteri.net/