A do të largohen trupat amerikane nga Kosova?
Misioni paqeruajtës i NATO-s në Kosovë, KFOR, i ka dhënë një përgjigje paralajmërimeve të medias gjermane BILD për mundësinë e largimit nga Kosova. Ata janë dislokuar këtë të enjte në bazën ushtarake të Bondsteel, për realizimin e ushtrimeve të përbashkëta. KFOR siguron se SHBA vijon të luajnë një rol të veçantë në Kosovë, me mbi 600 trupa.
Ky është njoftimi i fundit nga KFOR-i, që duket të jetë një përgjigje shtesë ndaj artikullit të gazetës së njohur gjermane BILD, e cila paralajmëroi mundësinë e largimit të ushtarëve amerikanë nga misioni paqeruajtës i NATO-s në Kosovë.
Pasi kjo stërvitje nuk është reagimi i vetëm i KFOR-it ndaj artikullit të mediumit gjerman, sipas të cilit Italia po përgatitet edhe për një tërheqje të mundshme të trupave amerikane nga Kosova. Atëherë aleatët evropianë do të ishin të vetëm në Ballkan kundër mikut të Putinit, Aleksandar Vuçiq, si dhe ushtrisë së tij të fuqishme serbe.
Pas publikimit të këtij artikulli, misioni paqeruajtës i NATO-s në Kosovë ka reaguar, duke thënë se SHBA e ka bërë të qartë angazhimin e saj ndaj Aleancës Veri-Atlantike, duke mos harruar se ka bërë të qartë edhe pritshmëritë e tyre, që aleatët e NATO-s të bëjnë më shumë, të investojnë më shumë dhe të prodhojnë më shumë në mbështetje të sigurisë.
Deklarata e KFOR-it:
“Shtetet e Bashkuara të Amerikës vazhdojnë të luajnë një rol themelor brenda KFOR-it, përmes kontributit të saj të gjatë, i cili aktualisht arrin në mbi 600 trupa.”
Kjo forcë ushtarake, që erdhi në Kosovë për të siguruar paqe dhe stabilitet më 1999, ka përsëritur qëndrimin se angazhimi i tyre për stabilitet në të gjithë Ballkanin Perëndimor është i palëkundur. KFOR-i vazhdon të zbatojë mandatin e tij – bazuar në Rezolutën 1244 të Këshillit të Sigurimit të OKB-së të vitit 1999 – për të kontribuar në një mjedis të sigurt për të gjithë njerëzit dhe komunitetet që jetojnë në Kosovë dhe lirinë e lëvizjes, në çdo kohë dhe në mënyrë të paanshme, dhe në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë, në rolet e tyre përkatëse si reagues të sigurisë./enews