Arma bërthamore, opsioni i fundit i Berlinit...
Gjermania ndodhet në dilemë përballë humbjes së mundshme të Ukrainës. Për shkak të largimit të Donald Trump nga Evropa, kontinenti europian po kërkon dëshpërimisht ide të reja për mbrojtje kundër kërcënimit rus. Papritur armët bërthamore franceze po diskutohen në Gjermani. Kështu thekson media e njohur gjermane, Die Welt.
Si hap të sajë të parë, Gjermania ka vendosur të mos marrë pjesë në një konferencë të OKB-së në Nju Jork për të rishikuar traktatin historik për ndalimin e armëve bërthamore, shkruan A2 CNN.
“Traktati për Ndalimin e Armëve Bërthamore daton në një kohë përpara luftës së agresionit rus kundër Ukrainës”, tha Ministria e Jashtme gjermane për agjencinë e lajmeve DPA, në Berlin. “Synimi dhe ambicia e traktatit nuk pasqyrojnë më realitetin aktual në politikën e sigurisë”, tha ajo.
Traktati u nënshkrua në vitin 2017 dhe hyri në fuqi në 2021. Aktualisht janë 94 nënshkrues dhe 73 shtete palë, sipas Agjencisë Ndërkombëtare për Shfuqizimin e Armëve Bërthamore (ICAN). Gjermania nuk posedon armë bërthamore, por është aleate me tre fuqi bërthamore në NATO: Shtetet e Bashkuara, Franca dhe Mbretëria e Bashkuar. Kthimi i mundshëm tek prodhimi i armëve bërthamore është opsioni i fundit i cili po diskutohet nëpër korridoret diplomatike të Berlinit. Berlini nuk është nënshkrues i traktatit të ndalimit, por ka marrë pjesë në konferencat e mëparshme si vëzhgues.
Lufta ruse në Ukrainë ka treguar "se parandalimi bërthamor është i domosdoshëm për sigurinë tonë", tha Ministria e Jashtme. Ministria vuri në dukje veprimet e Moskës si përshtatja e doktrinës së saj bërthamore, anulimi i angazhimit të saj për çarmatimin dhe zhvillimin e sistemeve të reja të armëve si Oreshnik. Kjo "paraqet sfida që Traktati mbi Ndalimin e Armëve Bërthamore nuk i përshtatet," shtoi Ministria e Jashtme. "Ky bojkot nga qeveria gjermane dërgon një sinjal fatal," tha Hubertus Sonntag, anëtar i bordit të ICAN Gjermani.
“Kjo shënon një hap dramatik prapa në rolin e Gjermanisë si një përkrahëse e diplomacisë ndërkombëtare të çarmatimit dhe bie ndesh me qëllimin e një bote pa armë bërthamore, të cilën qeveria gjermane e ka deklaruar vazhdimisht”.