Gjermania po diskuton masat, Austria pezullon bashkimin familjar për azilkërkuesit
Sunday, 16 March 2025 09:24
Partitë e Unionit CDU/CSU dhe SPD që do të krijojnë koalicionin e ardhshëm po diskutojnë mundësitë e zgjidhjes së problemeve të mëdha me migracionin ilegal. Në Gjermani vetëm vitin e kaluar kanë ardhur rreth 250.000 persona që kanë kërkuar për herë të parë azil. Ndërsa Qeveria e re e Austrisë ka kërkuar zyrtarisht pezullimin edhe të drejtës së azilëkërkuesve për bashkim familjar.
Kjo masë tani duhet të miratohet edhe në parlament dhe do të jetë e përkohshme, por pritet që të marrë mbështetjen sepse ate e kanë votuar përfaqësuesit e të gjitha partive në pushtet.
Kancelari i ri i Austrisë Christian Stocker i partisë popullore konservatore (ÖVP) tha se ndalimi i bashkimeve familjare për azilkërkuesit është i domosdoshëm, sepse Austria ka probleme dhe mbingarkesa shumë të mëdha në sektorin e arsimit.
Vetëm në vitet 2023 dhe 2024 në kuadrin e bashkimit familjar në Austri kanë hyrë 18.000 persona, ndër ta 13.000 fëmijë të moshës shkollore. Ndërsa vetë Austria ka rreth 9,2 milionë banorë.
Kritikët e qeverisë së re thonë se kjo masë është në kundrështim me të drejtën e azilit sipas Konventave evropiane, por partitë në pushtet i referohen një klauzole të emergjencës në ligjet e BE, ku thuhet se në rast të kërcënimit të rendit publik dhe sigurisë së brendshme të një vendi anëtar nuk vlen më prioriteti i së drejtës europiane kundrejt ligjit kombëtar të vendit anëtar./Na Bahri Cani