Hamasi: S’ka kuptim të vazhdojnë negociatat nën bllokadë, shfarosje dhe urie
Kryetari i Hamasit në Rripin e Gazës, Khalil al-Hayya, deklaroi të dielën se “nuk ka kuptim të vazhdojnë negociatat ndërkohë që populli ynë po përjeton bllokadë, shfarosje dhe uri”.Në një fjalim të publikuar në Telegram, ai bëri thirrje për mobilizim të përgjithshëm të popujve arabë dhe muslimanë drejt Palestinës, si dhe për rrethimin e ambasadave izraelite me qëllim thyerjen e bllokadës ndaj Gazës.
Al-Hayya u bëri apel vendeve arabe dhe islame që të ndërpresin çdo marrëdhënie politike, diplomatike dhe tregtare me Izraelin, si dhe të bojkotojnë ekonominë dhe turizmin izraelit.Ai theksoi se Hamasi ka treguar fleksibilitet në negociata për 22 muaj, por Izraeli është tërhequr nga raundi i fundit i bisedimeve me mbështetje të qartë amerikane, duke përdorur negociatat si mjet për të zvarritur kohën dhe për të ushtruar presion ndaj Gazës.Sipas tij, Izraeli vazhdon të përdorë ndihmat si “kurthe vdekjeje” dhe synon të krijojë një zonë tampon në Rafah për të shtyrë popullsinë drejt zhvendosjes jashtë Gazës, duke zbatuar një plan të rrezikshëm për spastrimin etnik të palestinezëve.Ai hodhi poshtë ndihmat ajrore të kufizuara si “skena propagandistike që nuk zëvendësojnë hyrjen e ndihmave në mënyrë të denjë përmes pikave kufitare”.
Al-Hayya kritikoi ashpër heshtjen e vendeve arabe dhe islame, duke thënë se Gaza po vdes nga uria para syve të botës, dhe paralajmëroi se populli palestinez ndjen braktisje të thellë.Në fund, ai u bëri thirrje të veçantë popujve të Egjiptit dhe Jordanisë që të mos lënë Gazën të vdesë urie në kufijtë e tyre, ndërsa kërkoi që Egjipti të marrë një qëndrim të prerë për hapjen e pikës kufitare të Rafahut.Al-Hayya vlerësoi gjithashtu iniciativat popullore dhe ushtarake në mbështetje të Gazës, veçanërisht nga Jemeni, Tunizia, Algjeria dhe Libia.
Që nga 7 tetori 2023, Gaza po përjeton një nga krizat më të rënda humanitare në histori, mes urisë dhe një lufte shfarosëse të udhëhequr nga Izraeli me mbështetje amerikane. Deri tani janë raportuar mbi 204 mijë të vrarë e të plagosur, shumica gra dhe fëmijë, si dhe më shumë se 9 mijë të zhdukur.