Gruaja përqafon autorin që i vrau burrin në gjyq: “Të fal
Një moment i pazakontë dhe emocional ndodhi në sallën e gjyqit të Qarkut Cherokee në Georgia, ku Regina Johnson përqafoi burrin që vrau bashkëshortin e saj, Joseph Tillman.
Tillman u dënua me 20 vjet burg për vrasjen e 78-vjeçarit Chuck Johnson, bashkëshorti i Reginës prej 50 vitesh, në një aksident me largim nga vendi i ngjarjes vitin e kaluar. Sipas hetimeve, Tillman ishte nën ndikimin e oksidit të azotit, i njohur si “gazi i qeshjes”, kur përplasi viktimën që po udhëtonte me biçikletë elektrike.
Gjatë seancës së dënimit më 7 gusht, Regina i vendosi krahun rreth qafës Tillmanit dhe e përqafoi për disa sekonda, duke i pëshpëritur se e falte. Tillman, me fytyrë të skuqur dhe lot në sy, i kërkoi falje duke përsëritur: “Më vjen shumë keq.”
“Zoti më tha se ai kishte nevojë për një përqafim prej nëne,” tha Regina më pas për mediat, duke theksuar nevojën për shërim dhe falje në mes të dhimbjes.
Në anën tjetër, vajza e viktimës, Brittany McCarthy, e pranishme në gjyq, u shpreh me dhimbje: “Do të jem gjithmonë vajza e një njeriu që ti e vrave. Ti u bëre armë vdekjeprurëse dhe babai im pagoi me jetën.”
Avokati i Tillmanit tha se klienti ka ndryshuar jetën dhe po përpiqet të ecë përpara në një rrugë pozitive.
Kjo ngjarje rrallëherë e parë, ku gruaja e viktimës fal dhe përqafon autorin në sallën e gjyqit, ka tronditur opinionin publik dhe nxitur reflektim mbi rëndësinë e faljes dhe shërimit.