Pentagoni paralajmëron: Fushata e zgjatur kundër Iranit mund të sjellë humbje të rënda për forcat amerikane.
Shtetet e Bashkuara po përballen me debate të brendshme mbi një përshkallëzim të mundshëm ushtarak ndaj Iranit, raportoi The Wall Street Journal, duke cituar zyrtarë amerikanë. Sipas burimeve, Pentagoni ka shprehur shqetësim për pasojat e një fushate të zgjatur ushtarake, duke vlerësuar se një konflikt i tillë mund të përfshijë rreziqe të konsiderueshme për forcat amerikane.
Departamenti i Mbrojtjes besohet se ka analizuar disa skenarë të mundshëm, që variojnë nga sulme të kufizuara deri te një fushatë ajrore intensive njëditore me objektiva strategjike në Iran. Megjithatë, zyrtarët kanë ngritur pikëpyetje mbi kostot e mundshme në njerëz dhe në rezervat e municioneve, në rast të një konflikti të zgjatur.
Sipas raportimit, një operacion i gjatë ushtarak mund të çojë në humbje të ndjeshme dhe të dëmtojë kapacitetet logjistike amerikane. Këto shqetësime janë reflektuar edhe në diskutimet e nivelit të lartë brenda administratës.
Burimet citojnë se qëndrimet e paraqitura nga Shefi i Shtabit pritet të ndikojnë në vendimmarrjen e presidentit Donald Trump. Deri më tani, Trump nuk ka marrë një vendim përfundimtar mbi qasjen ndaj Iranit, ndërsa opsionet mbeten në shqyrtim.