Izraeli mobilizon 100 mijë rezervistë dhe zgjeron ofensivën në Liban mes përshkallëzimit rajonal
Izraeli ka nisur mobilizimin e rreth 100 mijë rezervistëve, ndërsa përgatitet të zgjerojë ofensivën e tij përtej Iranit dhe Libanit, raportuan të hënën mediat izraelite.
Sipas portalit Walla, njësitë e inteligjencës ushtarake kanë nisur thirrjen e rezervistëve si pjesë e përgatitjeve për “teatro shtesë operacionesh dhe zgjerim të luftës”. Ushtria izraelite njoftoi të dielën se po përgatitet të përthithë rreth 100 mijë rezervistë të thirrur për të përforcuar të gjithë sektorët në kuadër të “Operacionit Luani Ulëritës”, emri i koduar i ofensivës së vazhdueshme kundër Iranit.
Në orët e para të së hënës, ushtria deklaroi se ka nisur një “betejë ofensive” kundër grupit libanez Hezbollah në territorin e Libanit. Sulmet ajrore izraelite goditën periferitë jugore të Bejrutit dhe zona në jug të Libanit, duke shkaktuar 31 të vdekur dhe 149 të plagosur, sipas Ministrisë së Shëndetësisë së Libanit.
Hezbollah njoftoi se ka lëshuar raketa dhe dronë ndaj një objekti ushtarak izraelit si kundërpërgjigje ndaj sulmeve pothuajse të përditshme të Tel Avivit në Liban dhe ndaj vrasjes së Liderit Suprem iranian, Ali Khamenei.
Që nga e shtuna në mëngjes, Izraeli dhe Shtetet e Bashkuara kanë kryer sulme ndaj Iranit, duke shkaktuar qindra viktima, përfshirë Khamenein dhe zyrtarë të lartë. Teherani është kundërpërgjigjur me lëshime raketash dhe dronësh ndaj Izraelit dhe bazave apo interesave amerikane në disa vende të Gjirit.
Uashingtoni dhe Tel Avivi e akuzojnë Teheranin se po ndjek programe bërthamore dhe raketore që kërcënojnë Izraelin dhe aleatët amerikanë në rajon. Irani, nga ana e tij, këmbëngul se programi i tij bërthamor ka qëllime paqësore dhe se nuk synon prodhimin e armëve bërthamore.