Netanyahu mohon presionin mbi SHBA: Trump e kupton vetë rrezikun nga Irani!
Kryeministri izraelit Benjamin Netanyahu ka mohuar raportet se Izraeli e ka tërhequr zvarrë SHBA-në në luftë me Iranin, duke i cilësuar ato si “pretendime qesharake”, ndërsa njëkohësisht ka lavdëruar ish-presidentin amerikan Donald Trump për vendosmërinë e tij.
“Donald Trump është udhëheqësi më i fortë në botë. Ai bën atë që mendon se është e drejtë për Amerikën. Ai gjithashtu po bën atë që mendon se është e drejtë për brezat e ardhshëm”, tha Netanyahu në një intervistë për Fox News.
Duke iu referuar Iranit, ai shtoi: “Pavarësisht nëse njerëzit e kuptojnë apo jo, udhëheqësi duhet ta kuptojë atë. Donald Trump e kupton këtë. Ju nuk keni pse ta tërhiqni atë në asgjë. Ai bën atë që mendon se është e drejtë, dhe kjo është e drejtë”. Sipas Netanyahut, Teherani është i përkushtuar për “shkatërrimin tuaj”, duke iu drejtuar SHBA-së.
Megjithatë, një raport i The New York Times, që citon zyrtarë amerikanë e izraelitë, diplomatë, ligjvënës dhe burime të inteligjencës, e përshkruan vendimin e SHBA-së për të goditur Iranin si një fitore të madhe për Netanyahun.
Sipas raportimit, Netanyahu kishte ngritur për herë të parë idenë e goditjes së objekteve raketore iraniane në dhjetor, gjatë një vizite në rezidencën e Trump në Florida. Në muajt në vijim, ai loboi vazhdimisht për veprime ushtarake, duke kërkuar që negociatat bërthamore nën ndërmjetësimin e Omanit të mos pengonin planet e tij.
Sulmet, të nisura më 28 shkurt në kuadër të operacionit “Epic Fury”, u realizuan me koordinim të ngushtë mes SHBA-së dhe Izraelit. Sipas qeverisë iraniane dhe mediave ndërkombëtare, ato çuan në vrasjen e udhëheqësit suprem iranian, Ali Khamenei.
Raporti thekson se takimet mes Netanyahut dhe Trumpit përfshinin diskutime të detajuara mbi kohën dhe shkallën e sulmit, ndërsa zyrtarë ushtarakë të dy vendeve koordinuan planifikimin deri në nisjen e operacionit. Koha dhe taktikat u rishikuan disa herë, përfshirë momentin kur Izraeli kërkoi më shumë kohë për përgatitjen e sistemeve mbrojtëse, kërkesë me të cilën Trump thuhet se u pajtua.
Edhe pse në Muscat dhe Gjenevë u zhvilluan raunde bisedimesh bërthamore që përfunduan vetëm dy ditë para nisjes së operacionit, zyrtarë amerikanë cituar nga media thanë se nuk kishte hapësirë reale për një marrëveshje që do të kënaqte të dyja palët. Fushata e koordinuar ushtarake vazhdon, me objektiva të gjerë dhe me raportime për viktima mes forcave amerikane.