Alarmon ambasada e SHBA në Jerusalem: Nuk garantojmë siguri për largimin nga Izraeli
Ambasada e Shteteve të Bashkuara në Jerusalem ka publikuar një njoftim për sigurinë, duke paralajmëruar shtetasit amerikanë se qeveria amerikane nuk mund të garantojë sigurinë e tyre nëse vendosin të largohen nga Izraeli në kushtet aktuale të tensioneve në rajon.
Në njoftimin zyrtar thuhet se informacioni mbi opsionet e largimit po jepet “si një shërbim për ata që dëshirojnë të largohen”, por autoritetet amerikane nuk mund të ofrojnë garanci për sigurinë gjatë udhëtimit apo kalimit kufitar.
Sipas përditësimit, personat që dëshirojnë të kalojnë drejt Jordanisë mund të përdorin shërbimet e autobusëve (shuttle) drejt qytetit Eilat dhe më pas të vazhdojnë në mënyrë të pavarur, për shembull me taksi, drejt pikës kufitare Yitzhak Rabin.
Autobusë do të vendosen në pika të ndryshme takimi në territorin e Izraelit, përfshirë:
– Herzliya (Parking i Stacionit të Trenit)
– Haifa (Yad HaShmona Train Station Parking Lot)
– Jerusalem (Teddy Stadium, East Parking Lot)
– Tel Aviv (Savidor Center Train Station Parking Lot)
Ambasada thekson se këto informacione publikohen për lehtësim orientimi dhe nuk përbëjnë një operacion evakuimi të organizuar nga SHBA. Paralajmërimi vjen në një moment përshkallëzimi të situatës së sigurisë në rajon, ku disa vende kanë lëshuar njoftime të ngjashme për shtetasit e tyre.
Autoritetet amerikane u bëjnë thirrje qytetarëve të ndjekin rregullisht njoftimet zyrtare dhe të marrin vendime të kujdesshme lidhur me lëvizjen dhe largimin nga zona.