Akuza tronditëse nga brenda ushtrisë amerikane: Lufta me Iranin po paraqitet si “plani i Zotit”?
Një raportim i gazetarit të pavarur Jonathan Larsen ka ngritur polemika të forta në SHBA, pasi sipas tij, disa komandantë të njësive luftarake amerikane po e paraqesin luftën kundër Iranit si pjesë të një “plani hyjnor”.
Sipas raportimit, një komandant i një njësie ushtarake amerikane u ka thënë nënoficerëve se konflikti me Iranin është pjesë e “God’s divine plan” (planit hyjnor të Zotit), duke pretenduar se Presidenti Donald Trump ishte “anointed by Jesus” (i vajosur nga Jezusi) për të ndezur Armagedonin.
Ankesa është depozituar pranë organizatës Military Religious Freedom Foundation (MRFF) dhe, sipas saj, është një nga mbi 110 ankesa të regjistruara brenda 48 orëve nga mbi 40 njësi ushtarake në të paktën 30 baza dhe instalime.
Ankuesit – mes tyre të krishterë, një mysliman dhe një hebre – kanë kërkuar të mbeten anonimë për shkak të frikës nga hakmarrja. Deri në momentin e raportimit, Pentagoni nuk kishte dhënë një reagim zyrtar.
Pretendimet sipas MRFF
Presidenti i MRFF-së, Mikey Weinstein, ka deklaruar se shumë pjesëtarë të forcave të armatosura raportojnë një “unrestricted euphoria” (eufori të pakufizuar) në segmente të zinxhirit komandues, ku sulmi ndaj Iranit paraqitet si i sanksionuar biblikisht dhe i lidhur me profecitë e kohëve të fundit të përshkruara në Librin e Zbulesës (Book of Revelation).
Sipas një nënoficeri që ka paraqitur ankesë, kjo retorikë po dëmton moralin dhe po cenon betimin kushtetues të ushtarakëve, veçanërisht për trupat në status Ready-Support, të cilët mund të dislokohen në çdo moment.
Kontroversia vjen në një kohë kur Sekretari i Mbrojtjes, Pete Hegseth, sipas raportimit, ka zgjeruar programe evangjeliste brenda Pentagonit, përfshirë sesione lutjesh dhe studime biblike të lidhura me një teologji të fortë pro-Izraelit.
Weinstein pretendon se disa komandantë amerikanë shfaqin entuziazëm për një përballje të ashpër ushtarake, duke e lidhur zhvillimin e ngjarjeve me një narrativë fundamentaliste të krishterë për fundin e kohërave.