Sulm me raketa në Ngushticën e Hormuzit, goditen tre anije
Një anije cisternë është bërë anija e tretë që goditet nga një raketë mëngjesin e kësaj të mërkure pranë Ngushticës së Hormuzit, një korridor i rëndësishëm detar që së fundmi është kthyer në fokus të tensioneve dhe luftës me Iranin.
Sipas autoritetit detar përgjegjës për zonën, UKMTO (United Kingdom Maritime Trade Operations), anija raportoi se u godit nga një “raketë e panjohur” ndërsa ndodhej rreth 50 milje detare në veriperëndim të Dubait. Autoritetet bëjnë me dije se ekuipazhi i anijes është i sigurt dhe se deri më tani nuk është raportuar ndonjë ndikim në mjedis.
Më herët gjatë ditës, një tjetër anije mallrash u përfshi nga flakët dhe u evakuua rreth 11 milje detare në veri të Gadishullit Musandam të Omanit pas një sulmi të ngjashëm, sipas raportimeve të UKMTO-së.
Po ashtu, një anije tjetër mallrash që u godit në brigjet e Emirateve të Bashkuara Arabe raportoi dëme më herët të mërkurën.
Sipas një deklarate të UKMTO-së, që nga fillimi i konfliktit janë sulmuar gjithsej 13 anije në këtë zonë strategjike detare.