Trump ultimatum Iranit: Hapni Ngushticën e Hormuzit brenda 48 orësh ose do të godasim centralet!
Presidenti i Shteteve të Bashkuara, Donald Trump, i ka dhënë Iranit një ultimatum 48-orësh për rihapjen e Ngushticës së Hormuzit, duke paralajmëruar sulme ndaj centraleve energjetike në rast se kërkesa nuk plotësohet, përcjell Fox News.
Në një postim në rrjetin social Truth Social, Trump deklaroi se SHBA do të “godasë dhe shkatërrojë” centralet e energjisë në Iran, duke nisur nga më i madhi, nëse lëvizja strategjike nuk hapet pa kushte dhe pa kërcënime.
Kjo deklaratë përbën një përshkallëzim të fortë të retorikës, ndërsa tensionet në rajon janë rritur ndjeshëm. Ngushtica e Hormuzit, një nga pikat më të rëndësishme të transportit global të naftës dhe gazit, përmes së cilës kalon rreth një e pesta e furnizimit botëror me naftë, ka pësuar kufizime të forta që prej fillimit të marsit.
Trump u shpreh gjithashtu se rihapja e ngushticës është një “manovër e thjeshtë ushtarake”, por kërkon mbështetje ndërkombëtare, duke kritikuar NATO-n për mungesë vullneti për t’u përfshirë.
Ndërkohë, mbi 20 vende, përfshirë Mbretërinë e Bashkuar, Francën, Gjermaninë dhe Japoninë, kanë shprehur gatishmëri për të kontribuar në garantimin e kalimit të sigurt të anijeve në këtë korridor jetik. Në një deklaratë të përbashkët, ato dënuan sulmet iraniane ndaj anijeve tregtare dhe infrastrukturës energjetike, si dhe bllokimin faktik të ngushticës.
Situata mbetet e tensionuar, ndërsa zhvillimet e fundit rrisin rrezikun e një përshkallëzimi të mëtejshëm të konfliktit dhe ndikimit në tregjet globale të energjisë.