Rusia lëshon rreth 1,000 dronë ndaj Ukrainës, një nga sulmet më të mëdha që nga nisja e luftës
Rusia ka ndërmarrë një nga sulmet më të mëdha ajrore që nga fillimi i luftës, duke lëshuar rreth 1,000 dronë ndaj Ukrainës brenda 24 orëve, përcjell Euronews.
Sulmet, që u zhvilluan mes 23 dhe 24 marsit, goditën pothuajse të gjitha rajonet e vendit, përfshirë edhe pjesën perëndimore. Pas një vale intensive gjatë natës me raketa dhe dronë, sulmet vijuan edhe gjatë ditës së martë, në një zhvillim të rrallë, me mbi 550 dronë të tjerë që synuan zonat qendrore dhe perëndimore.
Sipas autoriteteve lokale, të paktën tre persona humbën jetën dhe mbi 30 të tjerë u plagosën gjatë sulmeve të ditës. Ndërkohë, nga bombardimet gjatë natës u raportuan edhe katër viktima dhe 21 të plagosur.
Ndër qytetet e goditura ishte edhe Lviv, në perëndim të vendit, ku dronët rusë goditën zona civile pranë kufirit me Poloninë, duke lënë të paktën 17 persona të plagosur.
Ky sulm konsiderohet një nga më masivët që nga nisja e pushtimit të plotë të Ukrainës nga Rusia, duke rritur ndjeshëm tensionet dhe pasigurinë në rajon.