Araghchi zbulon: Marr mesazhe drejtpërdrejt nga Witkoff por nuk jemi ne negociata
Qeveria e Iranit ende nuk ka marrë ndonjë vendim nëse do të marrë pjesë në negociata me Shtetet e Bashkuara , tha Ministri i Jashtëm Abbas Araghchi , duke shprehur mosbesim të fortë ndaj Uashingtonit. Ai tha se niveli i besimit të Teheranit në Shtetet e Bashkuara është “zero” dhe konfirmoi se ka një shkëmbim mesazhesh me të dërguarin special të Donald Trump , por nuk po zhvillohen negociata.
Duke folur për rrjetin televiziv Al Jazeera të Katarit, kreu i diplomacisë iraniane theksoi se Teherani nuk beson se bisedimet me Uashingtonin mund të çojnë në ndonjë rezultat.
“Nuk kemi besim se negociatat me SHBA-në do të sjellin rezultate. Niveli i besimit është në zero”, tha ai, duke vënë në dukje se pala iraniane “nuk sheh ndershmëri” nga pala tjetër.
Abbas Araghchi theksoi se Teherani nuk do të pranonte thjesht një armëpushim që do të parashikonte pezullimin e sulmeve vetëm kundër Iranit.
Siç vuri në dukje ai, pala iraniane do të pranonte vetëm një ndërprerje të plotë të armiqësive në rajon, duke iu referuar indirekt zhvillimeve në Liban, ku Izraeli u përfshi në një luftë të re me lëvizjen shiite Hezbollah, e cila është afër Republikës Islamike, në fillim të marsit.
Ministri i jashtëm i Iranit zbuloi se ka komunikim të drejtpërdrejtë me palën amerikane, përmes një shkëmbimi mesazhesh me të dërguarin special të Presidentit Donald Trump, Steve Witkoff.
“Po marr mesazhe nga Witkoff direkt, si më parë”, tha ai, duke sqaruar megjithatë se kjo “nuk do të thotë se jemi në negociata”.
Abbas Araghchi theksoi se Teherani nuk i është përgjigjur propozimit prej 15 pikash që thuhet se është paraqitur nga Uashingtoni, dhe as nuk ka paraqitur kundërpropozimin e vet.
“Pretendimi (nga Uashingtoni) për negociata me këdo në Iran nuk është i vërtetë”, theksoi ai, duke përsëritur se deri më tani nuk ka marrëveshje për të filluar bisedime zyrtare.