Gjermania i bën thirrje Iranit të respektojë armëpushimin dhe të lirojë Ngushticën e Hormuzit
Ministri i Jashtëm gjerman Johan Vandeful i bëri thirrje homologut të tij iranian Abbas Araghchi që të respektojë armëpushimin e rënë dakord me SHBA-në.
Gjithashtu ai kërkon që Irani të lejojë lundrim të sigurt përmes Ngushticës së Hormuzit.
“I bëra thirrje Iranit që të respektojë armëpushimin, të angazhohet në negociata konstruktive dhe të lejojë lundrim të lirë dhe të sigurt përmes Ngushticës së Hormuzit”, tha Vandeful nëpërmjet X.
Po ashtu, ministrja Federale e Ekonomisë e përshkroi Ngushticën e Hormuzit si një “burim të rëndësishëm pasigurie”.
Në një deklaratë për Bild, Katharina Reiche tha se “armëpushimi i rënë dakord është një shenjë e parë e kujdesshme e deeskalimit”, por theksoi se “në të njëjtën kohë ne shohim gjithashtu se sa e brishtë dhe kritike është”.
Ngushtica e Hormuzit mbetet një burim i rëndësishëm pasigurie si një nga arteriet më të ndjeshme të tregut global të energjisë dhe madje edhe shqetësimet e vogla mund të shkaktojnë luhatje të mëdha çmimesh”, tha Reiche, duke pranuar se “ende nuk është e qartë se kur do të hapet në të vërtetë”.