Limaj rreshtohet me Hamzën: PDK merr mbështetjen e Nismës për zgjedhjet e 7 qershorit
Kandidati i PDK-së për kryeministër, Bedri Hamza, ka konfirmuar se Nisma Socialdemokrate e Fatmir Limajt do ta mbështesë PDK-në në zgjedhjet e 7 qershorit. Pas takimit me Limajn, Hamza e paraqiti këtë mbështetje si një hap të rëndësishëm drejt një bashkëpunimi më të gjerë politik, institucional dhe qeverisës.
Sipas Hamzës, PDK-në dhe Nismën i bashkojnë vlera, ideale dhe përgjegjësia për vendin. Ai tha se Kosova ka nevojë për bashkim, seriozitet dhe bashkëpunim në interes të qytetarëve, duke e cilësuar afrimin me Limajn si pjesë të një rrugëtimi të përbashkët për stabilitet, zhvillim dhe një Kosovë më të fortë.
Hamza falënderoi Fatmir Limajn për mbështetjen dhe korrektësinë, ndërsa u bëri thirrje mbështetësve të PDK-së, në Kosovë dhe diasporë, që më 7 qershor të votojnë për t’i thënë “STOP krizës” dhe për të ndryshuar vendin.