Republika Sërpska sfidon Brukselin, firmos me Moskën: BE alarmohet për sigurinë në Bosnje
Bashkimi Europian ka shprehur shqetësim për forcimin e lidhjeve mes Republikës Sërpska dhe Moskës, pas nënshkrimit të një memorandumi të ri bashkëpunimi policor në kryeqytetin rus.
Marrëveshja u firmos më 23 qershor në Moskë nga ministri i Brendshëm i Republikës Sërpska, Zhelko Budimir, dhe Oleg Baranov, kreu i Drejtorisë Kryesore të Ministrisë së Brendshme ruse për qytetin e Moskës. Baranov ndodhet nën sanksione të Bashkimit Europian.
Memorandumi zgjat një bashkëpunim të nisur më shumë se dhjetë vjet më parë dhe parashikon shkëmbim informacioni, trajnime profesionale dhe bashkëpunim në luftën kundër terrorizmit dhe formave të tjera të kriminalitetit. Teksti i plotë i marrëveshjes nuk është bërë publik.
Komisioni Europian ka theksuar se entitetet e Bosnje dhe Hercegovinës mund të zhvillojnë bashkëpunim ndërkombëtar vetëm brenda kompetencave të tyre dhe në përputhje me Kushtetutën e vendit. Sipas Brukselit, politika e jashtme mbetet kompetencë ekskluzive e shtetit të Bosnje dhe Hercegovinës, ndërsa entitetet kanë detyrim të mbështesin institucionet shtetërore.
Çështja është trajtuar edhe në Parlamentin Europian. Më 17 qershor, eurodeputetët miratuan një rezolutë për Bosnje dhe Hercegovinën, ku dënuan bashkëpunimin e autoriteteve të Republikës Sërpska me zyrtarë rusë të sanksionuar ndërkombëtarisht, duke paralajmëruar se këto lidhje përbëjnë rrezik për sigurinë dhe stabilitetin e vendit.
Bosnje dhe Hercegovina është bashkuar formalisht me sanksionet e Bashkimit Europian kundër Rusisë pas agresionit në Ukrainë, por zbatimi i tyre kundërshtohet nga politikanët e Republikës Sërpska. Kjo e kthen marrëveshjen e fundit në Moskë në një tjetër pikë përplasjeje mes Brukselit dhe Banja Lukës.