Serbia krijon grup pune kundër anëtarësimit të Kosovës në KE, Daçiq: Do udhëhiqet nga unë dhe Petkoviq
Ministri i Punëve të Jashtme të Serbisë, Ivica Daçiq, ka bërë me dije se ditën e sotme (5 prill) do të formohet ekipi special që do të luftojë kundër pranimit të Kosovës në Këshillin e Evropës, çështje kjo që do të diskutohet më 16 prill në Asamblenë Parlamentare të KE-së.
Daçiq ka deklaruar se ky ekip do të udhëhiqet nga ai dhe drejtori i Zyrës për Kosovë, Petar Petkoviq.
Formimin urgjent të këtij ekipi e kërkoi një ditë më parë (4 prill) presidenti serb Aleksandër Vuçiq në një seancë të jashtëzakonshme të Qeverisë.
“Nuk dua të jem i pakëndshëm para kamerave, vetëm ju kërkoj që t'i përkushtoheni. Është e një rëndësie vendimtare për ne dhe të bëni gjithçka që mundeni, të flisni me të gjithë, sepse do të ketë edhe Anëtarët e BE-së që e kanë njohur pavarësinë e Kosovës, për të cilën jam i sigurt se mund të sigurojmë se nuk janë pozitivë për anëtarësimin e Kosovës në Këshillin e Evropës dhe Hungaria nuk është e vetmja, dhe Hungaria është mikja jonë e madhe. Pra, ne duhet të punojmë dhe duhet të luftojmë dhe t'u tregojmë atyre të gjitha pasojat”, tha Vuçiq./rtsh.al/