Të rinjtë në Kosovë të gatshëm të kryejnë shërbimin ushtarak, nëse ai bëhet obligativ
Sunday, 15 September 2024 09:10
Pavarësisht se Kosova ende nuk e ka të obliguar shërbimin ushtarak, të rinjtë kosovarë janë shprehur të gatshëm që në rast se do të bëhej ky kusht, ata do t`i përgjigjeshin pozitivisht kësaj kërkese, shkruan RTK. Redona Rexhepi nga Podujeva, pothuajse për asnjë moment nuk e largon nga trupi këmishën e babait të vet që dikur e përdorte si ushtar i Ushtrisë Çlirimtare të Kosovës. Ajo e mban atë me shumë krenari. Megjithëse nuk ka qenë e lindur në luftën e fundit në Kosovë, ajo fort mirë e di historinë e para më shumë se dy dekadave.
Ajo tregon nga ajo që ka mësuar për gatishmërinë e babait që t’i shërbejë atdheut .
“Jam shumë krenare me babin që edhe ai pa hezituar ka pranuar të shkojë të luftojë për vendin e vet dhe sot jemi ku jemi…”, tha Redona Rexhepi, nxënëse.
Ndonëse është vetëm 17 vjeçe ajo thotë se të njëjtat hapa sikurse i kishte ndjekur babai i saj para 25 vjetësh, është në gjendje t`i ndjekë edhe ajo.
Madje nëse i kërkohet ndonjëherë që të bëhet pjesë e ushtrisë së Kosovës ajo do ta bënte pa asnjë hezitim.
“Pa problem, duke u nisur prej faktit që edhe babin e kam pas ushtar të Ushtrisë Çlirimtare të Kosovës, pa hezitim do të shkoja edhe unë..”, thotë ajo.
Ata që sapo kanë diplomuar në Fakultetin e Historisë, më së miri e dinë nëpër çka kaluar Kosova
Njëri prej tyre është edhe Egzon Kiqmari.
Thotë se në rast rreziku dhe për të mirën e vendit të tij, me shumë kënaqësi do të bëhej pjesë ushtrisë së Kosovës.
“Po në raste të rrezikshmërisë kur shtetit i duhet, me shumë dëshirë e shumë vullnet”, thotë Kiqmari.
Edhe të rinj të tjerë u shprehën të gatshëm t`i shërbejnë atdheut pa kursyer asgjë.
“Në qoftë se kërkohet përsëri për vendin tim të kontribojmë, me më thirr ushtria pse jo, është detyrim i imi që të kontribuoj për vendin”, tha Butrint Kryeziu, student.
E kushdo që ka dëshirë dhe vullnet që të bëhet pjesë e Ushtrisë së Kosovë, mund ta bëjë një gjë të tillë edhe tani.
Kjo pasi Ministria e Mbrojtjes tashmë e ka hapur konkursin për 300 ushtarë të rinj të Forcës së Sigurisë së Kosovës. Konkursi është i hapur nga 9 shtatori deri më 8 tetor dhe mund te aplikojnë të rinjtë shtetas të Republikës së Kosovës, nga mosha 18-25 vjeç./rtvbesa