Endri Meksi: Ermal Beqiri është prapa sulmeve të iranianëve të “Homeland Justice”
Biznesmeni dhe drejtori i përgjithshëm i MCN TV, Endri Meksi, ka folur pas paraqitjes së tij në SPAK, ku qëndroi për rreth gjashtë orë. Ai tha se thirrja ishte e pritshme dhe lidhej me investigimet e denoncimet për çështjen e AKSHI-t, të cilën MCN TV e ka ndjekur prej më shumë se një muaji e gjysmë si një aferë me interes të lartë publik.
Meksi theksoi se nuk ka asnjë “hall” personal dhe se dalja e tij publike synon të shmangë spekulimet. Ai u shpreh se besimi i tij te SPAK nuk ka ndryshuar, duke deklaruar se gjatë qëndrimit aty ka gjetur vetëm profesionalizëm nga hetuesit dhe prokurorët. Sipas tij, puna investigative e televizionit nuk do të ndalet dhe denoncimet për AKSHI-n do të vijojnë.
Pjesa më e fortë e deklaratës lidhet me dyshimet e Meksit se çështja e AKSHI-t mund të ketë lidhje me skandalin “Homeland Justice”, sulmet kibernetike ndaj sistemeve shqiptare dhe rrjedhjen e të dhënave sensitive. Ai tha se penetrimi në sistemet e AKSHI-t kishte nisur që nga periudha e zgjedhjeve të vitit 2021, duke e lidhur këtë me rrjedhjen e të dhënave të patronazhistëve dhe pagave.
Meksi deklaroi se “Homeland Justice” duhet të jetë pika nga ku duhet të nisë zbardhja e historisë, duke ngritur pyetje se kush ishte IT përgjegjës, nga dolën të dhënat dhe cila kompani mban përgjegjësi. Ai përmendi drejtpërdrejt emrin Ermal Beqiri, duke thënë se është “1000% i bindur” se kjo aferë ka një emër shqiptar dhe se duhet hetuar pse për të flasin aktualisht Berisha dhe Salianji, ndërsa vetë Beqiri nuk flet.