Tsipras fut Zvërnecin në kushtet e BE-së: Athina të kërkojë llogari nga Tirana për dhunën dhe pronat
Çështja e Zvërnecit ka kaluar kufijtë e debatit të brendshëm shqiptar dhe është futur në axhendën politike greke. Pas protestës së banorëve dhe aktivistëve kundër projektit turistik në zonën e mbrojtur Pishë-Poro–Nartë, ku u raportua edhe plagosja e një shtetasi grek, ka reaguar edhe formacioni politik i lidhur me ish-kryeministrin grek Aleksis Tsipras.
Në deklaratë thuhet se incidentet në Zvërnec po ndiqen “me shqetësim të madh” dhe kërkohet që qeveria greke të ndërmarrë demarshet e duhura protestuese ndaj qeverisë shqiptare. Theksi vendoset te nevoja për sqarim të plotë të ngjarjes, përgjegjësi për dhunën dhe mbrojtje të të drejtave të pronës.
Qëndrimi e lidh ngjarjen në Zvërnec edhe me çështjen e minoritetit grek në Shqipëri. Sipas deklaratës, respektimi i shtetit ligjor, i të drejtave pronësore dhe i të drejtave të vetëidentifikimit të Minoritetit Kombëtar Grek duhet të mbetet kusht i rëndësishëm në rrugën evropiane të Shqipërisë.
Kjo e bën reagimin më shumë se një koment politik për një incident lokal. Tsipras dhe e majta greke e vendosin Zvërnecin në kornizën e integrimit evropian të Shqipërisë, duke sinjalizuar se përplasjet për pronën, dhuna ndaj protestuesve dhe projektet në zona të mbrojtura mund të kthehen në argument politik edhe në Bruksel.
Reagimi vjen pas deklaratës së Ministrisë së Jashtme greke, e cila kërkoi sqarime nga Tirana për plagosjen e shtetasit grek dhe nënvizoi nevojën për respektimin e sundimit të ligjit, të drejtave të pronës dhe mbrojtjes së zonave mjedisore. Në këtë mënyrë, skandali i Zvërnecit nuk mbetet më vetëm përplasje mes banorëve, kompanisë dhe qeverisë shqiptare, por po merr dimension diplomatik dhe evropian.