Dosja 30 milionë euro: Shtyhet vendimi për Erion Isain e Kolonjës dhe 14 të pandehurit
Seanca paraprake ndaj kryetarit të Bashkisë së Kolonjës, Erion Isai, dhe 14 të pandehurve të tjerë është shtyrë për më 9 shtator. Shkak është bërë mosnjoftimi në mënyrën e duhur i të gjitha palëve të përfshira në proces.
Në Gjykatën e Posaçme u paraqit këtë të martë dosja që përfshin zyrtarë dhe ish-zyrtarë të Bashkisë së Kolonjës dhe Autoritetit Rrugor Shqiptar. Ata akuzohen nga SPAK-u për vepra të ndryshme penale, mes të cilave shpërdorimi i detyrës, shkelja e barazisë së pjesëmarrësve në tendera dhe, për disa prej të pandehurve, falsifikimi i dokumenteve.
Hetimi lidhet me tri procedura prokurimi të zhvilluara gjatë vitit 2020, vlera e përgjithshme e të cilave tejkalon 30 milionë euro. Një prej procedurave kryesore është tenderi për ndërtimin e rrugës Korçë–Ersekë, Loti 2, për të cilin SPAK-u pretendon se janë konstatuar parregullsi në dokumentacionin projektues dhe në procedurën e prokurimit.
Erion Isai akuzohet për “shpërdorim detyre” dhe “shkelje të barazisë së pjesëmarrësve në tendera apo ankande publike”, të kryera në bashkëpunim. Akuzat mbeten pretendime të organit të prokurorisë deri në dhënien e një vendimi përfundimtar nga gjykata.
Më 9 shtator, GJKKO-ja pritet të vendosë nëse dosja do të kalojë për gjykim, do t’i rikthehet SPAK-ut për plotësim të hetimeve apo çështja do të pushohet.