KONSULLATA SERBE NË SHKODËR NDEZ TIRANËN/ Majko e Bushati kundër qeverisë: “Serbia po merr më shumë se një zyrë”
Ideja për hapjen e një konsullate serbe në Shkodër ka ndezur një reagim të pazakontë politik në Tiranë, ku kundërshtimet nuk vijnë vetëm nga opozita, por edhe nga figura të rëndësishme të së majtës dhe ish-drejtues të diplomacisë shqiptare. Debati shpërtheu pasi ministri i Jashtëm serb Marko Gjuriç deklaroi se me homologun shqiptar Ferit Hoxha është arritur një marrëveshje në parim për hapjen e një konsullate shqiptare në Bujanoc dhe një serbe në Shkodër. Hoxha ka sqaruar se procesi nuk është finalizuar dhe e ka mbrojtur formulën me argumentin e reciprocitetit dhe interesit të Shqipërisë për një prani konsullore në Luginën e Preshevës.
Goditja më e fortë ndaj kësaj logjike ka ardhur nga ish-kryeministri socialist Pandeli Majko, i cili drejtonte qeverinë shqiptare gjatë luftës së Kosovës. “Serbia në Shkodër ka marrë më shumë se një konsullatë”, shkroi ai, duke theksuar se Bujanoci është pjesë e një zone historikisht të banuar nga shqiptarët, ndërsa Shkodra nuk ka të njëjtin raport demografik apo territorial me Serbinë. Majko nënvizon gjithashtu se mes Serbisë dhe Shkodrës ndodhet Mali i Zi dhe se çështja merr tjetër peshë kur Beogradi vazhdon të mos njohë pavarësinë e Kosovës.
Kundër është pozicionuar edhe ish-ministri i Jashtëm Ditmir Bushati, i cili shprehu publikisht shpresën që nisma të mos materializohet. Sipas tij, një konsullatë serbe në Shkodër nuk përputhet as me realitetin historik, as me peshën e pakicës serbe në zonë dhe krijon artificialisht një barazi me shqiptarët e Luginës së Preshevës. Fakti që kundërshtimi vjen nga dy figura të rëndësishme të së majtës e vendos qeverinë nën presion më të madh sesa një përplasje e zakonshme mazhorancë-opozitë.
Edhe deputetja e pavarur e Shkodrës Marjana Koçeku ka ngritur pyetjen se kujt do t'i shërbejë realisht konsullata, duke iu referuar Censusit të fundit, sipas të cilit në qarkun e Shkodrës rezultojnë vetëm 54 persona të vetëdeklaruar serbë. Po në këtë linjë, Jorida Tabaku ka vënë përballë këtë shifër me mbi 61 mijë shqiptarët e regjistruar në Serbi, duke kundërshtuar përdorimin e fjalës “reciprocitet”.
Nga opozita, deputeti shkodran Bardh Spahia e ka lidhur drejtpërdrejt nismën me afrimin e qeverisë Rama me Beogradin, duke pyetur përse Serbia duhet të vendoset pikërisht në “kryeqendrën e veriut” dhe në një qytet që historikisht ka qenë simbol i rezistencës shqiptare ndaj ekspansionizmit sllav.
Për momentin, konsullata nuk është një fakt i kryer. Por kontrasti është tashmë politikisht shpërthyes: Tirana argumenton se po siguron një përfaqësi për shqiptarët e Luginës së Preshevës, ndërsa kritikët pyesin se çfarë po merr Serbia në këmbim dhe përse pikërisht Shkodrën. Pikërisht kjo pyetje po e kthen një çështje konsullore në një debat mbi orientimin e politikës së jashtme shqiptare ndaj Beogradit.