Qëlloi Në Mesnatë, Me Armë Gjahu, Nga Ballkoni I Banesës Së Tij, Vihet Në Pranga
Shkodër-Një ngjarje e habitshme ka ndodhur në mesnatë drejt makinës së disa të rrinjve duke i rrezikuar seriozisht jetën atyre. Faktikisht kjo qitje e pakontrolluar nuk i ka rrenjët në rastsi, por është një produkt alla-Shqiptarçe, i cili është në sinkron të plotë me mugesën e empatisë njerëzore të "garantuar" nga mosfunksionimi i duhur i shtetit . Ndoshta njerëzit janë lodhur së tepërmi ndoshta shteti nuk arrin dot të garantojë siguri, apo ndoshta këto gjeste janë thirrje të dëshpëruara të një populli që ka nevojë për stabilitet dhe trajtim psikologjik? Kush mundet ta thotë me siguri.
Ja dhe deklarata e policisë:
"Qëlloi në mesnatë, me armë gjahu, nga ballkoni i banesës së tij, duke rrezikuar jetën e kalimtarëve në rrugë dhe dëmtoi një automjet të parkuar, vihet në pranga 83-vjeçari.Gjatë ndërhyrjes së Policisë, 83-vjeçari kërcënoi me armë zjarri kallashnikov, për t’i vrarë, punonjësit e Policisë.
Me ndërhyrjen e specializuar të Forcave Kombëtare të Sigurisë Shkodër, u bë i mundur neutralizimi dhe venia në pranga e 83-vjeçarit. Në banesën e të arrestuarit, Policia sekuestroi 1 armë zjarri kallashnikov, 1 armë gjahu dhe municion luftarak.
Shërbimet e Drejtorisë Vendore të Policisë Shkodër kanë konstatuar në mesnatë, se një shtetas po qëllonte me armë gjahu, nga ballkoni i banesës së tij në një pallat në lagjen “Partizani”, në drejtim të automjeteve të parkuara.Menjëherë u organizua puna, u bë rrethimi i zonës për të mos kaluar automjete dhe kembësorë, si dhe iu bë thirrje autorit, të mos qëllonte dhe të dorëzohej.
Autori nuk iu është bindur thirrjeve të Policisë, por është futur në banesë, ka mbyllur derën dhe ka kërcënuar për vrasje, punonjësit e Policisë, në rast se do të futeshin në banesë.Ndodhur në keto kushte, në ndihmë të Policisë vendore, kanë shkuar Forcat Kombëtare të Sigurisë.
Pas ndërhyrjes së specializuar kanë bërë të mundur neutralizimin dhe vënien në pranga të shtetasit F. H., 83 vjeç, banues në Shkodër.
Në vijim të veprimeve, shërbimet e Policisë sekuestruan 1 armë zjarri kallashnikov, 1 armë gjahu dhe municion luftarak.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme".