Dy të dyshuarit për spiunazh dalin para gjykatës
Në Gjykatën Themelore të Prishtinës ka filluar shqyrtimi fillestar ndaj të pandehurve Bedri Shabani dhe Muharrem Qerimi, të cilët akuzohen për spiunazh në favor të Agjencisë Serbe të Sigurisë dhe Informacionit (BIA).
Të pandehurit u sollën në seancë të shoqëruar nga forca të shumta të sigurisë dhe nën masa të rrepta, ndërsa akuzat ndaj tyre janë ngritur nga Prokuroria Speciale e Kosovës në shkurt të këtij viti.
Sipas aktakuzës, Shabani dhe Qerimi dyshohen se kanë transmetuar informacione të ndjeshme tek shërbimet sekrete serbe, përfshirë të dhëna mbi Ushtrinë Çlirimtare të Kosovës (UÇK), masakrat gjatë luftës, si dhe institucionet e sigurisë së Kosovës, përfshirë Agjencinë Kosovare të Inteligjencës (AKI), Policinë e Kosovës dhe Inspektoratin Policor.
Hetimet kanë treguar se informatat janë përcjellë përmes komunikimeve elektronike, si telefonata dhe e-mail-e. Përveç akuzës për spiunazh, Muharrem Qerimi përballet edhe me akuzën për armëmbajtje pa leje. / Dukagjini