SPAK nxjerr prova të reja. A është rënduar pozita e Veliajt?
Strategjia që Erion Veliaj shpalli një ditë më parë me shpresën se Apeli i GJKKO-së do ta nxjerrë nga burgu mori këtë të martë një goditje të fortë. Prokurorët Altin Dumani dhe Olsi Dado janë paraqitur përpara gjykatësit Engert Pëllumbi, me fakte të reja që kërkojnë të përligjin mbajtjen e tij në izolim. Burime të gazetarëve pranë SPAK flasin për disa audio-përgjime ambientale dhe telefonike të bëra ndaj kryebashkiakut Erion Veliaj, i cili komunikon me vëllain e tij Arbër Veliaj ku përmenden dhjetëra emra gazetarësh dhe bashkëpunëtorësh të tij dhe ku jepen porosi se si duhen mbajtur me të mira mediat. Menjëherë pas seancës gjyqësore që zgjati mbi shtatë orë gazetarja Klodiana Lala pohoi se këto fakte të reja mund ta rëndojnë edhe më pozitën e kryebashkiakut. Ndërsa Avokati Genc Gjokutaj tha se provat mund të jenë nxjerrë nga celulari që i është sekuestruar Veliajt, ndonëse ai nuk dha një provë për këtë.
Pasi prokurorët nxorën nga mënga asin e pergjimeve të reja, avokatët kanë kërkuar 24 orë për t’u njohur imtësisht me to dhe seanca do të vazhdojë të mërkurën pas orës 12:30.
I prangosur gati një muaj më parë, në 10 shkurt, kryebashkiaku i Tiranës tregoi në një postim të hënën nga qelia e tij në Durrës, një pjesë të argumentave që do të përdorte për të rifituar lirinë. Ai pretendon se është ende në detyrë dhe se duke u mbajtur në izolim, kjo gjë sjell dëme për banorët e Tiranës. “Lënia e kryeqytetit pa drejtim nga i votuari i njerëzve me një të rënë të lapsit është, në mos grusht shteti, grusht ndaj qytetit, punëve të tij dhe votuesve të Tiranës” ka shkruar Veliaj.
Ai ka paralajmëruar se do të radhisë si argument faktin se nuk është denoncuar nga një person real por me “letrat anonime” të të ashtuquajturit Nesti Angoni, se e kanë trajtuar si “të dënuar pa gjyq” dhe se është penalizuar për faktin se nuk ka treguar “pendesë” gjatë hetimit, ndonëse nuk ka ende një akuzë të ngritur kundër tij.
Të gjithë kleçkat që Veliaj ka gjetur në qëndrimet, thëniet dhe dokumentat e prokurorëve dhe gjykatësve synojnë një një pikë”, se mbajtja e tij në qeli është një masë shproporcionale. Për të përforcuar këtë përshtypje, kryebashkiaku në detyre ka pajtuar edhe një studio avokatie amerikane “Kasowitz Benson Torres LLP”, që i ka shërbyer më parë edhe presidentit Trump.
Përfaqësuesi i saj, Joshua Roberts, u shfaq në vigjilje të procesit në media përpara derës së burgut në Durrës për të thënë: “Në Shtetet e Bashkuara, sipas Kushtetutës dhe legjislacionit amerikan, akuzat penale ngrihen vetëm kur ekziston një shkak i arsyeshëm që një vepër penale është kryer. Gjithashtu, ndalimi i qytetarëve para gjykimit ndodh vetëm nëse ata paraqesin rrezik arratisjeje ose rrezik për shoqërinë”,- deklaroi Roberts.
Ai shtoi se “mbajtja e një politikani në paraburgim pa akuza të qarta dhe pa një rrezik të justifikuar është në kundërshtim me parimet e shtetit ligjor dhe demokracisë”.
Por, e vërteta e padrejtësve për të cilat Erioni flet, nuk është fiks ashtu siç e përshkruan ai. Në burg nuk ndodhet si i dënuar pa gjyq, por si një njeri që ka tentuar të prishë provat dhe të manipulojë dëshmitarët. Ndaj tij është zhvilluar një hetim paraprak dhe masa e sigurisë është vlerësuar nga gjykata. Kur flet për persekutim të familjes, ai harron se bashkëshortja e tij pastronte paratë e kompanive që kishin marrë favore prej tij me një zinxhir OJF që prodhonin fatura fiktive.
Veliaj pretendon gjithashtu se ai i është nënshtruar një “hetimi të biografisë personale apo vetting-u të paligjshëm, si ky imi për 20 vjet, që ndodhte vetëm në kohën e Sali Enverit, por jo sot në shek XXI”. Por ai harron se nga ky hetim pasuror kanë rezultuar vlera marramendëse, që ai deri më tani nuk po i justifikon dot.
Për të përforcuar këtë bindje të tyre, Altin Dumani dhe Ols Dado u paraqitën sot përpara gjykatësit me përgjimet e reja si prova se Veliaj dihet të vazhdojë të qëndrojë në burg. Gjykatësi Engert Pëllumbit, do të vendose se sa të vlefshme janë ato ditën e nesërme.
Së bashku me Veliajn, masat kundër tyre i kanë ankimuar edhe biznesmenët Meriman Palushi, Shkëlqim Fusha, Gentian Sula që kërkojnë heqjen e masës “detyrim paraqitje”, ndërsa biznesmeni Elman Abdule, i cili është i arrestuar, kërkon një masë më të butë se paraburgimi. Veliaj akuzohet për veprat penale “Korrupsion pasiv” dhe “Pastrim parash”, të kryer në bashkëpunim me bashkëshorten e tij Ajola Xoxa, e cila po hetohet në masë detyrim paraqitje, edhe për mosdeklarim pasurie./lapsi