Hotele dhe restorante rreth Kalasë së Petrelës, qeveria do t'i jap privatit 210 mijë m²
Wednesday, 26 March 2025 09:11
Në një sipërfaqe prej 210 mijë metrash katrorë në zonën e Petrelës, ku ndodhet edhe Kalaja historike, një monument kulture i rëndësishëm qeveria ka planifikuar ndërtimin e të ashtuquajturit “Parku i Besimit”. Ky projekt pretendohet se do të shërbejë si një simbol i harmonisë dhe tolerancës fetare, duke përfshirë kopje të monumenteve kulturore nga besime të ndryshme, përfshirë ato islame, të krishtera, budiste dhe të tjera.
Megjithatë, dokumentet e projektit tregojnë se përtej këtij synimi, në park do të ndërtohen dhjetëra hotele dhe restorante, duke ndryshuar ndjeshëm destinacionin e kësaj hapësire publike, kryesisht shtetërore. Përreth Kalasë së Petrelës, investimet qeveritare pritet të tërheqin interesin e madh të biznesit privat, ndërsa projekti, i prezantuar si një hap drejt tolerancës fetare, mund të rezultojë një tjetër iniciativë e zhvillimit komercial të maskuar.
Sipas të dhënave zyrtare, pjesë e këtij parku do të jenë akomodime të shumta, të prezantuara si “streha mikpritëse” për vizitorët, duke përfshirë pelegrinë dhe turistë të mirëqenies. Janë planifikuar deri në 75 njësi akomodimi për kategori të ndryshme vizitorësh, ndërsa do të shtohen edhe 25 njësi shtesë të dizajnuara për “retreat-e holistike të mirëqenies”. Në total, zona do të përfshijë rreth 100 hotele dhe një numër të konsiderueshëm restorantesh.
Për të mbështetur idenë e diversitetit dhe harmonisë, projekti përfshin ndërtimin e një mini-parku “Kur’anor”, të frymëzuar nga ai në Dubai, si dhe projekte të tjera të ngjashme me “Shtëpinë e Familjes Abrahamike” në Abu Dhabi, “Kopshtet e Botës” në Berlin, kopshtet “Bahá’” në Haifa dhe “Kopshtin e Paqes” në Dublin.
Ndërsa qeveria e promovon këtë iniciativë si një hapësirë për dialog dhe bashkëjetesë mes besimeve, mbetet e paqartë nëse thelbi i projektit është vërtetë harmonia fetare apo një tjetër shembull i komercializimit të hapësirës publike./tvanews