6 vite pas tërmetit: Pallati në Kombinat i rrënuar, 7 banorë vdesin në pritje të banesës
Gjysmë dekade pas tërmetit shkatërrimtar të vitit 2019, plagët e rindërtimit në Kombinat vazhdojnë të jenë të hapura. Ndërtesa nr. 12 në Rrugën “Qelqit”, një pallat i vitit 1968, i klasifikuar zyrtarisht si i pabanueshëm dhe i rrezikshëm, vazhdon të mbahet pezull mes harresës dhe degradimit, pa asnjë vendim për prishje apo rindërtim.
Denoncimi i fundit vjen nga imami i zonës, i cili ngre shqetësimin për një situatë që po zvarritet prej 6 vitesh. Ndërsa bonus qiraje jepet, asnjë masë konkrete nuk është marrë për zgjidhjen përfundimtare. Topografët janë shfaqur vetëm dy javë më parë për matjet e para, të cilat do t’i dorëzohen një kompanie private për ekspertizën e thelluar, por banorët kujtojnë se premtime të ngjashme kanë dëgjuar për vite me radhë.
Në gjithë këtë kohë, pallati me dy hyrje dhe 18 apartamente është degraduar më tej, duke u bërë një strukturë e rrezikshme jo vetëm për banorët, por për të gjithë zonën. Më dramatikja: 7 kryefamiljarë të këtij pallati kanë ndërruar jetë duke pritur banesën e re të premtuar, ndërsa të tjerët vazhdojnë të jetojnë mes pasigurisë, problemeve shëndetësore dhe ndjesisë se janë të braktisur nga institucionet që duhet t’i mbrojnë.
Situata ngre pyetje të forta: Si është e mundur që një godinë e shpallur e pabanueshme të mbetet për 6 vite pa status? Pse procesi i rindërtimit mbetet i bllokuar? Kush mban përgjegjësi për familjet që kanë vite në pritje të një strehe të sigurt?
Ndërkohë që institucionet lëvizin me ritme burokratike, banorët vazhdojnë të numërojnë vitet dhe fatkeqësisht, edhe jetët që po humbasin në pritje të zgjidhjes së munguar./joq