Pse Rama u ribashkua me Vuçiçin
Nga Ditmir Bushati
Ne shqiptarët nuk kemi asnjë dilemë dhe mbetemi të patundshëm në aspiratën tonë për t’u bashkuar me popujt e tjerë në familjen europiane. Ndaj, meritojmë të informohemi për arsyet e kësaj nisme e të dëgjohemi se çfarë mendojmë se duhet bërë për të jetësuar rrugën europiane.
Ish-ministri i Jashtëm Ditmir Bushati ka kritikuar ashpër nismën e përbashkët të kryeministrit shqiptar dhe presidentit serb për një model të ri raporti me Bashkimin Europian, duke e cilësuar atë si një “perde tymi” që devijon nga objektivi kryesor i anëtarësimit të plotë në BE. Në një reagim në rrjetet sociale, Bushati thekson se kjo nismë bie ndesh me premtimet për përmbylljen e negociatave deri në vitin 2027 dhe anëtarësimin deri në vitin 2030, duke sugjeruar në vend të kësaj një raport “të nivelit të dytë” me BE-në.
Sipas tij, në një kohë kur zgjerimi i BE-së është rikthyer si prioritet strategjik për shkak të luftës në Ukrainë, çdo devijim nga rruga e anëtarësimit është i pajustifikuar. Bushati argumenton se propozimi për pjesëmarrje në tregun e brendshëm dhe zonën Schengen pa anëtarësim nuk qëndron, pasi këto janë procese komplekse që kërkojnë standarde të larta në sundimin e ligjit, ekonomi dhe institucione. Ai kujton se edhe vendet si Kroacia, Bullgaria dhe Rumania kanë kaluar vite të tëra pas anëtarësimit për t’u bërë pjesë e Schengen-it, ndërsa modele si Norvegjia apo Islanda janë të pakrahasueshme me realitetin e Shqipërisë dhe Serbisë.
Bushati thekson gjithashtu se integrimi në tregun e brendshëm të BE-së nuk është një proces i thjeshtë ekonomik, por kërkon besim të plotë në institucionet shtetërore, luftë reale kundër korrupsionit dhe krimit të organizuar, si dhe zbatim rigoroz të rregullave europiane. Ai nënvizon se problemet me prokurimet publike, hetimet e SPAK dhe mungesa e besimit nga partnerët ndërkombëtarë janë tregues se Shqipëria nuk është ende gati për një hap të tillë pa përmbushur më parë kriteret bazë.
Në përfundim, ish-ministri i Jashtëm thekson se e vetmja rrugë e qëndrueshme për Shqipërinë mbetet anëtarësimi i plotë në BE, duke paralajmëruar kundër “iluzioneve” dhe zgjidhjeve të ndërmjetme që, sipas tij, rrezikojnë të zbehin ambicien europiane të vendit. Ai bën thirrje për një debat të hapur politik dhe shoqëror mbi çështje të tilla dhe për një strategji të qartë e transparente që garanton reforma reale dhe rezultate të matshme në rrugën drejt Bashkimit Europian.