A qëndron Kushner, njeriu i Sazanit pas idesë për zbrazjen e Gazës
Një artikull i gjatë i të përditshmes franceze Liberation ka hedhur hije dyshimi se pas qëndrimeve të presidentit Trump për spastrimin e Gazës dhe shëndërrimit të bregdetit të saj në një zonë ndërtimi, me hotele dhe banesa luksi, qëndrojnë interesat financiare të dhëndërrit të tij, Jared Kushner.
Burri i Ivankës që ka mbajtur gjatë mandatit të parë të Trump rolin e këshilltarit e ka hedhur këtu e një vit më parë këtë ide, gjatë një bisede në Universitetin e Harvardit. Njeriut që Bashkë me Rikard Grenëllin, Edi Rama po i dhuron falas tokën publike në Sazan dhe po e josh për ndërtime në Zvërnec, njësoj si Vuçiçi që i ka dhënë ndërtesën e ish ministrisë së luftës të bombarduar nga NATO, për të ndërtuar në Beograd, i ka bërë këto deklarata në Shkurt 2024, ndërkohë që enklava palestineze po bombardohej. “Nëse unë do të isha në vend të Izraelit, do të bëja çështë e mundur ti largoja njerzit dhe pastaj të filloja pastrimin”, ka thënë atëherë Kushner duke propozuar se palestinezët e spastruar mund të vendoseshin drejt shkretëtirës izraelite të Neguevit.
“Në vend që të paguhen para për tunele dhe armatime njerëzit duhet të fokusohen tek vlera e madhe e pronave në bregdet”, pati deklaruar ai.
Gazeta i bën një portretizim atipik bashkëshoritit të Ivanka Trumpit: “Me pamjet e tij prej dhëndërri ideal, por pa asnjë eksperiencë në qeverisje, Jared Kushner ka qenë një nga këshilltarët kryesorë të Donald Trump gjatë mandatit të tij të parë, duke luajtur një rol të rëndësishëm në politikën amerikane në Lindjen e Mesme. Shumë i heshtur gjatë fushatës elektorale të vitit 2024, madje edhe pasi vjehërri i tij u rikthye në Shtëpinë e Bardhë, bashkëshorti i Ivanka Trump, 44 vjeç, mund të ketë pasur ndikim në deklaratën e fundit të papritur të presidentit të 47-të të Shteteve të Bashkuara mbi Rripin e Gazës. Edhe pse nuk mban një post zyrtar në administratën Trump 2.0, Kushner vazhdon të ushtrojë një ndikim si këshilltar joformal për çështjet e Lindjes së Mesme, veçanërisht falë marrëdhënieve të tij me udhëheqësit e rajonit. Deklaratat e Donald Trump më 4 shkurt në mbrëmje, ku ai e cilësoi Gazën si “një vend për shembje“ me potencial të lartë për pasuri të paluajtshme, që ka potencial të bëhet “riviera e Mesdheut“ mund të jenë frymëzuar prej tij”, ka shkruar Liberation. Më pas gazeta kujton se ai ka qenë arkitekt i marrëveshjeve të Abrahamit kur Emiratet e bashkuara Arabe, Maroku dhe Bahreini u bënë vendet arabe që normalizuan, në vitin 2020, marëdhëniet me Izraelin, ndonëse me çmimin e shtrenjtë të harresës së Palestinës dhe njohjes së shtetit të saj.
Më poshtë gazetarja e Liberation Isabelle Hanne bën edhe një historik të krijimit të fondit të investimeve Afinitty Partners që u themelua ne vitin 2021, me të ardhurat e Arabisë Saudite dhe Katarit, i cili është i njëjti që mendohet të marrë edhe Sazanin. Aty theksohet se 2 miliardë dollarë iu dhanë atij nga fondi sovaran i Arabisë Saudite i drejtuar nga princi i kurrorës i njohur me inicialet “MBS”.
Në fakt, Jared Kushner ka një marrëdhënie të ngushtë me Mohammed bin Salman (MBS) e cila filloi kur ai ishte këshilltar i lartë i Donald Trump në Shtëpinë e Bardhë.
Kushner ishte një nga mbështetësit kryesorë të MBS-së pasi ai u bë princ i kurorës në vitin 2017 dhe e mbrojti atë edhe pas vrasjes së gazetarit Jamal Khashoggi në vitin 2018, pavarësisht kritikave ndërkombëtare. Roli i tij në negociatat për shitjenn e armëve dhe marrëveshjet tregtare midis SHBA-së dhe Arabisë Saudite, si dhe afërsia për të komunikuar drejtpërdrejt me MBS-në përmes ëhatsApp-it, duke anashkaluar kanalet tradicionale diplomatike, bënë që marëdhënia të ruhej edhe pas humjes së Trump në 2021-shin. Pas largimit nga Shtëpia e Bardhë, Kushner siguroi një investim prej 2 miliardë dollarësh nga fondi sovran saudit për kompaninë e tij të investimeve Affinity Partners, që pritet të investohen në Serbi dhe në Jug të Shqipërisë.
Por pyetja që shtrohet është: A është i interesuar Kushner të ndërtojë edhe në Gaza dhe a qëndrojnë interesat e tij pas deklaratave të Trump që shokuan mbarë botën? Për këtë asgjë nuk dihet me siguri. “Fakti i vetëm është se Affinity Partners ka iteresa në disa kompani israelite që kanë investuar në kolonitë e paligjshme të ngritura në Çizjordani. Vetëm pak kohë më parë ai morri leje nga autoritetet rregulluese izraelite që të dyfishojë kapitalin në një kompani hebreje, Phoenix financial e cila ka investuar në ndërtim dhe sigurime në kolonitë që e drejta ndërkombëtare i konsideron si ilegale” shkruan Liberation duke hedhur dyshime se e njëjta që mund të imagjinohet edhe mbi Gazën nëse zbrazet nga popullësia e saj./ Lapsi.al