Arrestimi i Veliajt, midis vendosjes së drejtësisë dhe vendosjes së neodiktaturës
Nga Floriar Arapi
Arrestimi i Veliajt dhe vendimi i gjykatës për ta lënë atë në burg pa afat është një arritje e madhe për shtetin shqiptar. Për herë të parë arrestohet dhe merret nga zyra për korrupsion një ndër figurat politike me pushtetin më të madh në vend, defakto numri dy pas kryeministrit. Ky arrestim, megjithëse me shumë gjasa është një arrestim i një drejtësie me porosi, zhbën mitin e paprekshmërisë së hajdutëve që na qeverisin.
A ishte arrestimi i Veliajt i padrejtë dhe pse hedh dyshimin e një drejtësie me porosi ?
Provat që dëgjuam nga dosja e Veliajt ishin plotësisht të mjaftueshme për të vërtetuar vjedhjen dhe korrupsionin e tij.
Në lidhje me drejtësinë me porosi, Rama në një konferncë për shtyp në vitin 2018 tha: “ Erjon Veliaj mund të dalë në televizor sa të dojë dhe mund të mbjelli pemë sa të dojë, por një ditë në një nga ato pemë do të varet si shembull që në këtë parti grupet armiqsore do vazhdojnë të marrin goditjen e duhur,...”
Veliaj megjithëse një figurë shumë e rëndësishme e pushtetit socialist ishte njëherësh edhe një kërcënim për pushtetin e përhershëm të Ramës. Pas dështimit të partisë së tij G99, futja e tij në partinë socialiste dhe në majat e pushtetit socialist, dukej të ishte e imponuar nga klani Soros dhe jo një ftesë nga vetë Rama. Në këtë pikë Veliaj dhe Basha kishin ngjashmëri, të dy të imponuar për të qenë numrat dy të partive përkatëse si dhe pasardhës të kryetarëve përkatës, Rama dhe Berisha. Berisha mbase duke qenë më i vjetër në moshë, pranoi të bënte sikur po largohej nga drejtimi i partisë por Rama jo, ai nuk është as i vjetër në moshë, as nuk ka humbur zgjedhje kështu që nuk ka çfarë ti nevojitet një rival apo zëvendës, aq më tepër tani që Soros ka rënë nga pushteti në SHBA. Me arsyen e mësipërme, pra kërcënimi i pushtetit të Ramës mbi partinë, dyshimi apo bindja për një drejtësi të porositur është evidente.
Arsye të tjera për të dyshuar për një drejtësi të porositur mund të rendis:
⁃ Megjithëse SPAK dhe sistemi i ri i drejtësisë duket i pavarur ai deri tashmë ka qenë shumë i butë me masat ndaj politikanëve, duke i dënuar ata me dënime minimale një deri në dy vjet burgim, mjaftueshëm për ti nxjerrë ata nga politika dhe për ti bërë biznesmenë të suksesshëm siç është rasti i Saimir Tahirit apo të tjerë.
⁃ Është e çuditshme sesi askund në asnjë përgjim apo hetim nuk ka dalë emri i Ramës. Nuk ka asnjë mundësi llogjike që drejtuesi i një pushteti ti ketë zgjedhur të gjithë njerëzit rreth tij hajdutë dhe të korruptuar dhe ai vetë të mos dijë asgjë për këtë apo të mos jetë ortak me ta.
Tashmë që Rama e zhduku apo e rrëzoi politikisht edhe Veliajn, ai nuk ka më asnjë pengesë për neodiktaturën që po instalon gradualisht, një sistem autoritarizmi ku pothuajse çdo pushtet është në dorën e tij. Për të realizuar këtë ai ka përdorur sundimin mafioz të mjeteve demoktratike siç janë sundimi i mediave, por edhe kontrollin e drejtpërdrejtë mbi bandat kriminale duke i vënë ata në funksion të mbajtjes së pushtetit me anë dhunës dhe presionit ndaj votuesve, blerjen e votave apo nëpërmjet blerjes së gjithkujt, opinionistëve, gazetarëve, këngëtarëve, njerëzve të show-ut, njerëzve me influencë etj.
Megjithatë duhet thënë se në arrestimin e Veliajt, Rama shprehu disa shenja nervozizmi, gjë që na bën të presim për të parë në vijimësi nëse veprimet e SPAK, do të vazhdojnë të jenë në përputhje të plotë me interesat e Ramës apo do çedojnë.
Gjithsesi një gjë shumë të rëndësishme që duhet të kemi parasysh është që dera e burgut për maskarenjtë është hapur. Kjo do të thotë që edhe nëse këtë hapje e ka porositur Rama për interesin e tij, kjo derë do të jetë e hapur edhe për Ramën nesër dhe në momemtin që ai bie nga pushteti, çekiçi i drejtësisë do të bjerë patjetër mbi të. Me këtë shpresohet se paqja mbi korrupsionin, e vendosur nga Berisha për korrupsionin e Nanos dhe të gjithë të tjerëve në vitin 2005, apo edhe më parë nga Nano në vitin 1997, tashmë ka mbaruar dhe të gjithë palët do të fusin njëri tjetrin në burg për korrupsion.
Në aspektin e shtetit të së drejtës dhe interesit të qytetarëve, kjo gjë është tejet pozitive sepse korrupsioni nuk do të jetë më i paprekshëm siç ishte deri tani. Në vijim do të do të shohim ndryshim të fytyrave të politikanëve pasi hajdutët me vulën e drejtësisë me dosjet dhe pasuritë e tyre të denocuara publikisht do ta kenë shumë më të vështirë për të vazhduar të jenë të suksesshëm në politikë, megjithë protestat banale të militantëve të verbër poshtë ballkonit të SPAK-ut për Veliajn apo ato poshtë ballkonit të Berishës.
Në sjelljet politike të muajve të fundit ka diçka interesante për tu përmendur. Është një histori e përsëritur e vitit 2003. Në atë kohë midis kryeministrit Nano dhe opozitës së Berishës dukej se kishte një koordinim midis tyre për të fundosur Ramën dhe për këtë u ngrit edhe një komisionin hetimor (Olldashi) ndaj Ramës si kryetar i bashkisë. Në veprimet politike të muajve të fundit opozita u përqendrua pothuajse totalisht tek Veliaj dhe la mënjanë korrupsionet galopante të Ramës, me koncesionet e rrugëve etj. Ata organizuan një numër të shumtë protestash para bashkisë së Tiranës për të rrëzuar sa të munden imazhin e Veliajt përpara arrestimit. Veprime të tilla të lënë të dyshosh për një paqe midis Berishës dhe Ramës dhe koordinim për fundosjen e Veliajt. Duke qenë se Berisha e di mirë se pothuajse nuk ka asnjë mundësi për ti fituar zgjedhjet, ai është mjaftuar me eskluzivitetin e opozitarizmit dhe me këtë veprim ai po bëhet kumbari i instalimit të neodiktaturës ramiste, në këmbim të ruajtjes së drejtimit të opozitës.
Për instalimin e kësaj neodiktature “demokratike” Rama përveç kontrollit dhe manipulimit të faktorit të brendshëm, me situatën e re globale po përpiqet të ripozicionohet me shpejtësi. Tashmë që liberalistët e Soros kanë rënë nga pushteti në SHBA ai po distancohet prej tij dhe po bën përpjekje maksimale për tu renditur në krah të Trump dhe duket se po ia arrin të ketë sukses. Duhet patur parasysh që për të blerë këtë mbështetje ai nuk shet pronat e babës por shet Shqipërinë. Në rastin më të fundit po jep ishullin e Sazanit vajzës së Trump e cila bashkë me burrin e saj Jared Kushner, menaxhon bizneset e babait.
Së fundmi, me futjen në burg të Veliajt, Berishës, Metës, etj është ngritur dilema, a duhet të gëzohemi kur hajduti më i madh fut në burg hajdutët më të vegjël, apo duhet të hidhërohemi sepse hajduti i madh po bëhet diktator ?!