7 qarqe me rënie drastike të popullsisë gjatë 2024, Korça në krye
Shtesa natyrore e popullsisë në Shqipëri ishte pozitive gjatë vitit 2024, pasi numri i lindjeve ishte më i lartë se ai i vdekjeve. Kjo ndodhi për shkak se rënia e vdekjeve ishte më e theksuar se rënia e lindjeve. Sipas të dhënave të INSTAT, në shkallë kombëtare pati 1,178 lindje më shumë se vdekje, megjithatë, në shtatë qarqe të vendit, shtesa natyrore rezultoi negative.
Nga 12 qarqet, Korça shënoi rënien më të madhe të shtesës natyrore, pasi numri i vdekjeve ishte ndjeshëm më i lartë se ai i lindjeve. Në këtë qark, gjatë vitit të kaluar lindën 1,155 foshnja, ndërsa humbën jetën 1,929 persona, duke krijuar një diferencë negative prej 774 personash.
Fieri ishte qarku i dytë me rënien më të madhe natyrore të popullsisë. Në vitin 2024, aty lindën 1,897 bebe, ndërsa u regjistruan 2,481 vdekje, duke rezultuar në një shtesë natyrore negative prej 584 personash.
Situatë e ngjashme u regjistrua edhe në qarqet e tjera: në Vlorë numri i vdekjeve ishte 554 më i lartë se ai i lindjeve, në Berat 368, në Gjirokastër 354, në Shkodër 176 dhe në Elbasan 142.
Ndërkohë, vetëm pesë qarqe patën një shtesë natyrore pozitive: Tirana, Durrësi, Dibra, Kukësi dhe Lezha. Tirana, për shkak të popullsisë më të re, kishte një bilanc pozitiv prej 3,047 lindjesh më shumë se vdekje, duke ndikuar ndjeshëm në mbajtjen e shtesës natyrore në nivel pozitiv për të gjithë vendin. Në Durrës kishte 571 lindje më shumë se vdekjet, në Dibër 243, në Kukës 192, ndërsa në Lezhë diferenca ishte shumë e vogël, vetëm 22 lindje më shumë se vdekjet.
Shtesa natyrore e popullsisë në Shqipëri ka pësuar një rënie të ndjeshme që nga vitet 1990. Në atë kohë, diferenca mes lindjeve dhe vdekjeve ishte rreth 64,000 persona, me 82,000 lindje dhe 18,000 vdekje. Para pandemisë, në vitin 2019, ky tregues ra në 6,624 persona, me 28,561 lindje dhe mbi 22,000 vdekje.
Në vitin 2021, për herë të parë, shtesa natyrore e popullsisë u bë negative, me 3,296 vdekje më shumë se lindje, kryesisht për shkak të pandemisë COVID-19. Ndërsa në vitin 2024, u regjistrua një shtesë natyrore prej 1,178 personash, pasi në vend lindën 22,425 foshnja dhe humbën jetën 21,247 persona.
Parashikimet demografike sugjerojnë se popullsia e Shqipërisë do të vazhdojë të tkurret në dekadat e ardhshme. Sipas raporteve ndërkombëtare, deri në vitin 2050, vendi mund të humbasë rreth 25% të popullsisë së tij, kryesisht për shkak të emigracionit të lartë në moshat e reja, që ndikon në zvogëlimin e popullsisë aktive dhe në shtesën natyrore. Si pasojë, mosha mesatare e popullsisë është rritur me 7.5 vite midis dy censuseve të fundit, të realizuara në vitet 2011 dhe 2023./joq