Tragjedia e Roskovecit, jo vetëm histori xhelozie? Hetuesit përballë misterit të parave dhe dëshmisë së ish-partneres
Ngjarja që tronditi Roskovecin vijon të ngrejë më shumë pikëpyetje sesa përgjigje. Pas mbi dhjetë orësh negociata me Policinë dhe forcat RENEA, bilanci i tragjedisë ishte fatal: dy viktima, një pengmarrje dhe më pas vetëvrasja e autorit të dyshuar, Refit Buzi.
Ndërkohë, dëshmia e ish-partneres së tij ka hedhur dritë mbi momentet dramatike që përjetoi gjatë orëve kur u mbajt peng. Sipas saj, 35-vjeçari e kishte kërcënuar vazhdimisht me armë dhe nuk e lejonte të largohej, duke e mbajtur nën presion të vazhdueshëm psikologjik. Vetëm pas negociatave të gjata ai pranoi ta lironte, ndërsa ajo u dërgua në spital për shkak të gjendjes së rënduar emocionale.
Paralelisht me hetimet për dinamikën e krimit, një tjetër element po tërheq vëmendjen e hetuesve. Bëhet fjalë për një shumë të konsiderueshme parash, që sipas pretendimeve të bëra nga familjarë dhe burimeve të ndryshme lidhet me periudhën kur Buzi jetonte në Britaninë e Madhe. Ende nuk ka një version zyrtar që të sqarojë origjinën, destinacionin apo rolin që këto para mund të kenë pasur në konfliktin mes palëve.
Grupi hetimor pritet të marrë sërish në pyetje 24-vjeçaren Rozalinda Plaka, e cila u mbajt peng për disa orë nga ish-partneri i saj, Refit Buzi, pasi ky i fundit vrau babanë e saj dhe plagosi rëndë nënën, e cila humbi jetën disa orë më vonë. Burime pranë hetimit bëjnë me dije se dëshmia e parë e së resë nuk ka hedhur dritë mbi motivet që çuan 35-vjeçarin të kryente krimin e rëndë dhe më pas të vetëvritej, pas rreth 10 orësh negociata me Policinë dhe forcat RENEA për t’u dorëzuar.
Sipas të njëjtave burime, Rozalinda Plaka, menjëherë pasi u la e lirë nga autori, ka rrëfyer vetëm ngjarjet që ndodhën brenda banesës mëngjesin e 24 korrikut. Në gjendje të rënduar psikologjike, ajo ka deklaruar se ishte në gjumë kur dëgjoi zhurma në shtëpi. Kur u zgjua, pa Refit Buzin brenda dhomës së saj, të armatosur me një armë gjahu. “Më kërcënoi të shkoja në makinë me të dhe ta ndiqja nga pas”, ka deklaruar ajo para hetuesve. 24-vjeçarja ka treguar se në ato momente nuk e kuptonte çfarë kishte ndodhur në banesë. “Pashë vetëm babanë të shtrirë në kuzhinë, ndërsa nënën nuk arrita ta shihja”, mësohet të ketë dëshmuar ajo.
Sa i përket motiveve të krimit, përfundimit të marrëdhënies me Refit Buzin, si edhe pretendimeve të këtij të fundit se i kishte dërguar nga Anglia 830 mijë paund për t’ia ruajtur dhe që nuk i ishin kthyer, e reja nuk ka dhënë shpjegime. Për këtë arsye, grupi hetimor pritet ta marrë sërish në pyetje në vijim të hetimeve.
Ngjarja e rëndë ndodhi mëngjesin e 24 korrikut në fshatin Vidhisht të Roskovecit, ku mbeti i vrarë Kosta Plaka dhe u plagos rëndë bashkëshortja e tij, Belere Plaka e cila ndërroi jetë disa orë më pas. Ndërsa autori 35-vjeçar Refit Buzi kreu vetëvrasje brenda mjetit të tij duke mos iu bindur negociatave për vetëdorëzim, pas afro 10 orësh.