Shefi i inteligjencës gjermane: Rusia po përgatitet për l.uftë me Perëndimin
Shefi i inteligjencës gjermane, Bruno Kahl ka pohuar se Rusia po përgatitet në mënyrë aktive për një konflikt ushtarak me NATO-n brenda pesë viteve të ardhshme, transmeton Anadolu.
"Rusia po përgatitet për luftë me Perëndimin", tha Kahl, kreu i agjencisë së inteligjencës së jashtme BND, në një mbledhje të mërkurën vonë në Këshillin Gjerman për Marrëdhëniet me Jashtë (DGAP).
Ai tha se sipas informacionit të BND-së, Rusia aktualisht po ndërmerr ristrukturimin më të madh të forcave të saj të armatosura që nga viti 2008 dhe po investon shumë në sisteme të avancuara të armëve.
"Inteligjenca jonë tregon se, përveç ndryshimeve strukturore siç është riorganizimi i rretheve ushtarake, ka gjithashtu një rritje gjithëpërfshirëse të forcave tokësore, e cila ka qenë gjithmonë një kategori kryesore për rusët", tha ai.
"Për këtë qëllim, Kremlini rekruton disa qindra mijëra ushtarë çdo vit, dukshëm më shumë se humbjet vjetore në luftën në Ukrainë. Forca totale e planifikuar e personelit të forcave të armatosura ruse prej një milion e gjysmë trupash ndoshta do të arrihet në vitet e ardhshme", shtoi Kahl.
Ai nënvizoi se investimet ruse në mbrojtje tani po tejkalojnë ndjeshëm atë që shtetet evropiane po investojnë të gjitha së bashku. Ai pretendon se përgatitjet masive ushtarake të Rusisë janë drejtuar kryesisht drejt kufirit lindor të NATO-s.
"Moska jo vetëm që po ndjek qëllimin e rindërtimit të aftësive të saj ushtarake përtej fuqisë së paraluftës, por edhe një rritje të konsiderueshme në forcat dhe burimet e saj konvencionale. Forcat e armatosura ruse ndoshta do të jenë në një pozicion, për sa i përket personelit dhe materialit, për të nisur një sulm kundër NATO-s deri në fund të dekadës", tha Kahl./AA