“Rusia do ta p.ushtojë Europën nëse SHBA heq dorë nga NATO!”
Presidenti ukrainas, Volodymyr Zelensky, ka paralajmëruar se ekziston një rrezik i sigurt që Rusia do ta pushtojë Europën, veçanërisht nëse SHBA tërhiqet nga mbështetja ndaj NATO-s. Ai ka deklaruar se inteligjenca ukrainase ka vënë re 150 mijë trupa ruse të grumbulluara në Bjellorusi.
Gjatë një interviste për NBC News, Zelensky theksoi se ai e beson Donald Trump, por nuk do të pranonte kurrë një marrëveshje armëpushimi të përpiluar pa pjesëmarrjen e Ukrainës.
Ai paralajmëroi se Putin po pret dobësimin e NATO-s dhe se tërheqja e mbështetjes ushtarake amerikane do ta vinte në një pozitë të vështirë Ukrainën dhe vendet e ish-bllokut sovjetik.
"Ka rreziqe që kjo mund të ndodhë në Poloni dhe Lituani, sepse ne besojmë se Putin do të luftojë kundër NATO-s," tha Zelensky.
"Unë besoj se Shtetet e Bashkuara nuk do të tërheqin trupat e tyre nga Europa, sepse kjo do ta dobësonte seriozisht NATO-n dhe kontinentin europian. Putin e llogarit këtë," shtoi ai.
Sipas tij, pa mbështetjen e administratës amerikane, Ukraina ka "pak shanse për të mbijetuar", duke marrë parasysh se tashmë ka humbur 20% të territorit nga forcat ruse dhe ka tre vite që po përballon këtë luftë.
Zelensky i bëri thirrje Europës dhe Ukrainës të jenë pjesë e çdo procesi negociator dhe i kërkoi Trump-it të sigurojë që Ukraina të mos përjashtohet nga bisedimet me Putinin.
"Unë kurrë nuk do të pranoj ndonjë vendim midis Shteteve të Bashkuara dhe Rusisë për Ukrainën, kurrë," tha ai. "Kjo është një luftë kundër nesh, me viktima të popullit tonë."
Ndërkohë, SHBA dhe Rusia pritet të zhvillojnë bisedime në Arabinë Saudite para një takimi të mundshëm midis Trump dhe Putin.
I dërguari i posaçëm i Trump-it për Ukrainën dhe Rusinë, Keith Kellogg, ka deklaruar se liderët europianë nuk do të jenë pjesë e negociatave për të ndalur luftën, pavarësisht rolit të tyre kyç në garantimin e një marrëveshjeje të mundshme paqeje./JOQ