Fitoi llotarinë kur ishte 18-vjeçe, pas 10 vitesh e quan “mallkimin” e jetës
Ëndrra e vërtetë amerikane për shumëkënd është të fitojë llotarinë Powerball, por për një grua që e ka përjetuar këtë realitet, fitimi i madh nuk ka qenë aq i bukur sa duket. Një dekadë pas fitores së saj, ajo e quan llotarinë një "mallkim", pasi e ka lënë të jetojë një jetë 'pa kuptim'.
Në moshën 18-vjeçare, ajo fitoi llotarinë, dhe megjithëse nuk zbuloi shumën e saktë, la të kuptohej se nuk kishte nevojë të punonte për një kohë të gjatë. Tani, në moshën 28-vjeçare, ajo ka ndarë historinë e saj në Reddit duke kërkuar këshilla se si t'i japë kuptim jetës së saj.
"E fitova llotarinë kur sapo kisha mbushur 18 vjeç," shkroi ajo. "Më pas bleva një shtëpi të vogël dhe kam jetuar aty për 10 vite, duke mos bërë asgjë tjetër veçse duke luajtur lojëra, shikuar filma, duke biseduar online me të panjohur, ku dhe u përfshiva në një lidhje në distancë, e cila nuk funksionoi. Në thelb, jam kthyer në një person që s’bën asgjë produktive."
Ajo tregon se shkoi në universitet dhe u diplomua për drejtësi, madje nisi edhe masterin, por në një moment humbi interesin dhe vendosi ta braktisë.
"Tani jam 28 vjeç dhe nuk kam asnjë jetë sociale, asnjë qëllim në jetë, asnjë hobi. Kuptoj që po i afrohem të 30-ave dhe nuk kam punuar asnjë ditë në jetën time, sepse nuk më është dashur. Të gjitha faturat i kam të paguara për momentin, por e di që kjo nuk do zgjasë përgjithmonë. Ndjej se fitorja e llotarisë ishte një mallkim, sepse nuk kam orientim, nuk kam personalitet të formuar. E di që jam në një pozicion të privilegjuar sepse kam ende disa para, por po çmendem nga fakti që nuk di çfarë të bëj tjetër në jetë. Jam e vetmuar dhe jeta më duket pa kuptim. Nuk e di si do kishte qenë jeta ime nëse nuk do ta kisha këtë 'rrugë të lehtë'. S'di nga t'ja nis. Askush s'më ka marrë seriozisht, sepse jam shumë e mërzitshme. S'kam ide çfarë do bëj për karrierën, s'di çfarë aftësish kam dhe nga do e filloja, duke paraqitur një CV boshe? Në botën e sotme? Kjo më tremb."
Pra, a është me të vërtetë një bekim të fitosh llotarinë? Shpresojmë që kjo fituese të gjejë paqen në jetën e saj!/JOQ